Perinthalmanna Radio
Date: 02-09-2025
മലപ്പുറം: ഇതര സംസ്ഥാനങ്ങളിലെ മലയാളികള് ഓണത്തിന് നാട്ടിലെത്താൻ പാടുപെടും. ബംഗളൂരു, ചെന്നൈ, മുംബൈ, ഹൈദരാബാദ് എന്നിവിടങ്ങളില് നിന്ന് സ്ലീപ്പർ, തേർഡ് എ.സി, സെക്കൻഡ് എ.സി എന്നിവയിലൊന്നും ജില്ലയിലെ പ്രധാന സ്റ്റേഷനുകളിലേക്ക് കണ്ഫേം ടിക്കറ്റില്ല.
ട്രെയിനുകളില് ടിക്കറ്റ് തീർന്നതോടെ അന്തർ സംസ്ഥാന ബസുകള് ടിക്കറ്റ് നിരക്ക് ഇരട്ടിയിലധികമായി വർദ്ധിപ്പിച്ചിട്ടുണ്ട്. ബംഗളൂരുവില് നിന്ന് മലപ്പുറത്തേക്ക് സെപ്തംബർ 2,3 തീയതികളില് സ്ളീപ്പർ ക്ലാസില് 1,700 മുതല് 2,000 രൂപ വരെയാണ് നിരക്ക്. 800 മുതല് 900 രൂപ വരെയാണ് സാധാരണ നിരക്ക്.
ബംഗളൂരുവില് നിന്നുള്ള പ്രതിദിന ട്രെയിനായ യശ്വന്ത്പൂർ കണ്ണൂർ എക്സ്പ്രസില് (16257) തിരുവോണത്തിന് തൊട്ടുമുമ്ബുള്ള ദിവസങ്ങളില് സ്ലീപ്പറില് തിരൂരിലേക്ക് വെയ്റ്റിംഗ് ലിസ്റ്റ് 150 കടന്നിട്ടുണ്ട്. സെപ്തംബർ 20 കഴിയണം കണ്ഫേം ടിക്കറ്റ് ലഭിക്കാൻ. രാത്രി എട്ടിന് പുറപ്പെട്ട് പുലർച്ചെ 5.55ന് തിരൂരിലെത്തുന്ന ഈ ട്രെയിനിനെയാണ് ജില്ലയില് കൂടുതല് പേരും ആശ്രയിക്കുന്നത്. തിങ്കളാഴ്ചകളില് സർവീസ് നടത്തുന്ന യശ്വന്ത്പൂർ മംഗലാപുരം എക്സ്പ്രസില് (16565) ഇനി ഒക്ടോബർ പത്തിന് ശേഷമാണ് തിരൂരിലേക്ക് ടിക്കറ്റുള്ളത്. ബംഗളൂരുവില് നിന്ന് കേരളത്തിലേക്ക് സ്പെഷല് ട്രെയിനുകള് അനുവദിച്ചിട്ടുണ്ടെങ്കിലും ജില്ല വഴി കടന്നുപോവുന്നില്ല. ഈ ട്രെയിനുകളിലും ടിക്കറ്റില്ല.
ചെന്നൈയില് നിന്ന് തിരൂർ വഴി ദിവസം നാല് ട്രെയിനുകള് സർവീസ് നടത്തുന്നുണ്ടെങ്കിലും സെപ്തംബർ 10 വരെ ടിക്കറ്റില്ല. ചെന്നൈ സെൻട്രലില് നിന്നുള്ള മൂന്ന് ട്രെയിനുകളിലും എഗ്മോറില് നിന്നുള്ള ട്രെയിനിലും ടിക്കറ്റില്ല. വൈകിട്ട് 4.20നുള്ള ചെന്നൈ സെൻട്രല് മംഗലാപുരം എക്സ്പ്രസ് (12685), രാത്രി 8.10ന് പുറപ്പെട്ട് രാവിലെ 6.25ന് തിരൂരിലെത്തുന്ന ചെന്നൈ മംഗലാപുരം മെയില് (12601), ഉച്ചയ്ക്ക് 1.15ന് പുറപ്പെട്ട് രാത്രി 12.32ന് തിരൂരിലെത്തുന്ന വെസ്റ്റ് കോസ്റ്റ് എക്സ്പ്രസ് (22637), രാത്രി 11.15ന് ചെന്നൈ എഗ്മോറില് നിന്ന് പുറപ്പെട്ട് പിറ്റേന്ന് 1.28ന് തിരൂരിലെത്തുന്ന മംഗലാപുരം എക്സ്പ്രസ് ( 16159) ട്രെയിനുകളിലെല്ലാം ഇതിനകം കണ്ഫേം ടിക്കറ്റ് തീർന്നിട്ടുണ്ട്. ഉയർന്ന നിരക്കുള്ള തത്കാല്, പ്രീമിയം തത്കാല് ടിക്കറ്റുകളുണ്ട്.
———————————————
®Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ