കീഴാറ്റൂരിൽ ബഡ്‌സ് സ്‌കൂളിന് സ്വന്തം കെട്ടിടമായി

Perinthalmanna Radio
Date: 05-05-2025

പട്ടിക്കാട് : കീഴാറ്റൂർ ഗ്രാമപ്പഞ്ചായത്തിലെ ബഡ്‌സ് സ്‌കൂളിന് സ്വന്തം കെട്ടിടമായി. ഒറവംപുറത്ത് എസ്.വി. മോഹനനും സഹോദരി മാലതിയും സൗജന്യമായി നൽകിയ 20 സെന്റ് സ്ഥലത്താണ് പുതിയ കെട്ടിടം നിർമിച്ചത്. ജില്ലാ പഞ്ചായത്ത് പ്രസിഡന്റ് എം.കെ. റഫീഖ ഉദ്ഘാടനം ചെയ്തു. ഗ്രാമപ്പഞ്ചായത്ത് പ്രസിഡന്റ് ജമീല ചാലിയത്തൊടി അധ്യക്ഷയായി. ഡെപ്യൂട്ടി കളക്ടർ ഇ. ഷറഫുദ്ദീൻ, ബ്ലോക്ക് പഞ്ചായത്ത് വൈസ് പ്രസിഡന്റ് കെ. വനജ, ഗ്രാമപ്പഞ്ചായത്ത് വൈസ് പ്രസിഡന്റ് എൻ. മുഹമ്മദ്, അസീസ് പട്ടിക്കാട്, പി.കെ. സഫ്‌ന അനസ്, എൻ.കെ. ബഷീർ തുടങ്ങിയവർ പ്രസംഗിച്ചു.

വിവിധ വാർഷിക പദ്ധതികളിലുൾപ്പെടുത്തി ജില്ലാ പഞ്ചായത്ത് അനുവദിച്ച 1.05 കോടി രൂപ ചെലവിലാണ് എല്ലാവിധ സൗകര്യങ്ങളോടെയും പുതിയ കെട്ടിടം യാഥാർഥ്യമാക്കിയത്. കടലുണ്ടിപ്പുഴയിൽ മുങ്ങിത്താഴ്ന്ന കുട്ടികളെ രക്ഷിച്ച വിദ്യാർഥികളായ നബീൽ, ജാസിൻ അലി, റാഷിം എന്നിവരെ അനുമോദിക്കൽ, ഭിന്നശേഷിക്കുട്ടികൾക്കുള്ള പ്രിവിലേജ് കാർഡ് വിതരണം തുടങ്ങിയവയും നടന്നു.

®Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ