മണ്ണാർമലയിൽ പുലിയെ പിടികൂടാൻ കെണി സ്ഥാപിച്ചു

Perinthalmanna Radio
Date: 06-02-2025

പട്ടിക്കാട് : മണ്ണാർമല ജനവാസമേഖലയിൽ പുലിയിറങ്ങിയ പ്രദേശത്ത് വനംവകുപ്പിന്റെ നേതൃത്വത്തിൽ കെണി സ്ഥാപിച്ചു. സ്വകാര്യവ്യക്തിയുടെ തെങ്ങിൻതോപ്പിൽ നാട്ടുകാർ സ്ഥാപിച്ച സി.സി.ടി.വി. ക്യാമറയിൽ പുലിയുടെ ദൃശ്യം പതിഞ്ഞ പ്രദേശത്തിനു സമീപമാണ് കെണി വെച്ചത്. നാട്ടുകാരുടെ സഹകരണത്തോടെ വനം വകുപ്പ് ഉദ്യോഗസ്ഥരുടെയും ആർ.ആർ.ടി. അംഗങ്ങളുടെയും ഒന്നരമണിക്കൂർ നീണ്ട പരിശ്രമത്തിനൊടുവിലാണ് കെണിയൊരുക്കിയത്.

തിരൂരിൽ സ്ഥാപിച്ചിരുന്ന കെണി ബുധനാഴ്ച വൈകീട്ട് 6.30-ഓടെയാണ് സ്ഥലത്തെത്തിച്ചത്. പുലി ക്യാമറയിൽ കുടുങ്ങിയതിന് തൊട്ടുമുകൾഭാഗത്ത് മണ്ണാർമലയിൽനിന്ന് തെക്കൻമലയിലേക്ക് റോഡ് മുറിച്ച് കടന്നുപോകുന്ന സഞ്ചാരപാതയിൽ സ്ഥാപിച്ച കെണിയിൽ നായയെ ആണ് ഇരയായി വെച്ചിട്ടുള്ളത്. കഴിഞ്ഞ ദിവസം മാനത്തുമംഗലം കാര്യാവട്ടം ബൈപ്പാസ് റോഡിൽ മണ്ണാർമല മാട് റോഡ് ഭാഗത്ത് സ്ഥാപിച്ച ക്യാമറയിൽ പുലിയുടെ ചിത്രം പതിഞ്ഞിരുന്നു. ഈ സാഹചര്യത്തിലാണ് അധികൃതർ പ്രദേശത്ത് കെണി വെച്ചത്.

ആർ.ആർ.ടി. സെക്‌ഷൻ ഫോറസ്റ്റ് ഓഫീസർ രഞ്ജിത്ത്, ബീറ്റ് ഫോറസ്റ്റ് ഓഫീസർമാരായ എസ്. സനൽകുമാർ, നൗഷാദ് പാക്കട, ബീറ്റ് ഫോറസ്റ്റ് ഓഫീസർ പ്രജിത്ത്, വാർഡ് അംഗം ഹൈദർ തോരപ്പ, മണ്ണാർമല റിയൽ സ്റ്റാർ ക്ലബ് പ്രവർത്തകർ തുടങ്ങിയവർ നേതൃത്വം നൽകി.
………………………………………..
കൂടുതൽ വാർത്തകൾക്ക് www.perinthalmannaradio.com എന്ന ഞങ്ങളുടെ വെബ്സൈറ്റ് സന്ദര്‍ശിക്കുക
———————————————-
പെരിന്തൽമണ്ണയിലേയും പരിസര പ്രദേശങ്ങളിലേയും വാർത്തകൾ വാട്സാപ്പിൽ   ലഭിക്കാൻ താഴെ കാണുന്ന ലിങ്കിൽ ക്ലിക് ചെയ്യുക

https://chat.whatsapp.com/Kw2z7JE7mRXJuiFDiLrY8H
———————————————
®Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ