സംസ്ഥാനപാത നവീകരണം വൈകുന്നു; മേലാറ്റൂരിൽ ഇന്ന് റോഡ് ഉപരോധ സമരം

Perinthalmanna Radio
Date: 07-01-2025

മേലാറ്റൂർ : അഞ്ച് വർഷം മുൻപ് തുടങ്ങിയ ഒലിപ്പുഴ-മേലാറ്റൂർ-പുലാമന്തോൾ സംസ്ഥാനപാതയുടെ നവീകരണം പൂർത്തിയാക്കാത്തതിൽ മേലാറ്റൂർ ജനകീയ കൂട്ടായ്മ ചൊവ്വാഴ്ച സംസ്ഥാനപാത ഉപരോധിച്ച് പ്രതിഷേധിക്കും. രാവിലെ 10-ന് മേലാറ്റൂർ അങ്ങാടിയിലാണ് ഉപരോധസമരം. 2020-ൽ 144 കോടി വകയിരുത്തിയാണ് 30 കിലോമീറ്റർ ദൈർഘ്യമുള്ള റേഡിന്റെ നവീകരണം തുടങ്ങിയത്.

കെ.എസ്.ടി.പി.യാണ് നിർമാണം ഏറ്റെടുത്തിരുന്നത്. എന്നാൽ നാളിതുവരെയായിട്ടും പണി പൂർത്തിയാക്കാൻ സാധിച്ചിട്ടില്ല. നിയമസഭയിലടക്കം വിഷയം ചർച്ചയായിട്ടും പണി സ്തംഭിച്ചുകിടക്കുകയാണ്. കുണ്ടും കുഴിയും നിറഞ്ഞ റോഡിലൂടെയുള്ള യാത്ര ദുഷ്‌കരമാകുകയും പൊടിശല്യം രൂക്ഷമാകുകയും ചെയ്തതോടെ മേലാറ്റൂർ നിവാസികൾ ജനകീയസമിതി രൂപവത്കരിച്ച് സമരത്തിനിറങ്ങിയിരുന്നു. കുറ്റിപ്പുറത്തെ കെ.എസ്.ടി.പി. ഓഫീസിൽ ചെന്ന് അസി. എക്സിക്യുട്ടീവ് എൻജിനീയറെ നേരിൽ കണ്ട് യാത്രാദുരിതം വിവരിക്കുകയും ചെയ്തിരുന്നു. ഒരാഴ്ചക്കുള്ളിൽ പണി പുനരാരംഭിക്കുമെന്ന് അന്ന് ഉദ്യോഗസ്ഥർ ഉറപ്പ് നൽകി.

രണ്ടു ദിവസത്തിനുശേഷം മണ്ണുമാന്തിയും മറ്റുമെത്തിച്ച് റോഡിലെ മെറ്റലും പൊടിയും നീക്കുകയും അവിടവിടങ്ങളിലായി പേരിന് ടാറൊഴിച്ച് ചില്ലറപ്പണികൾ നടത്തുകയുമല്ലാതെ പിന്നീട് യാതൊന്നും നടന്നില്ല. ഇതേ തുടർന്നാണ് ജനകീയസമിതി സമരം ശക്തമാക്കാൻ തീരുമാനിച്ചത്.
………………………………………..
കൂടുതൽ വാർത്തകൾക്ക് www.perinthalmannaradio.com എന്ന ഞങ്ങളുടെ വെബ്സൈറ്റ് സന്ദര്‍ശിക്കുക
———————————————-
പെരിന്തൽമണ്ണയിലേയും പരിസര പ്രദേശങ്ങളിലേയും വാർത്തകൾ വാട്സാപ്പിൽ   ലഭിക്കാൻ താഴെ കാണുന്ന ലിങ്കിൽ ക്ലിക് ചെയ്യുക

https://chat.whatsapp.com/G1EZoPPO7BGKJcREbdUair
———————————————
®Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ