Perinthalmanna Radio
Date: 07-02-2025
പെരിന്തൽമണ്ണ : അമ്പതു ശതമാനം സി.എസ്.ആർ. ഫണ്ട് ഉപയോഗിച്ചും അമ്പതു ശതമാനം ഗുണഭോക്താക്കളിൽനിന്ന് ഈടാക്കിയും പകുതി വിലയിൽ വിദ്യാർഥികൾക്ക് ലാപ്ടോപ്പ്, വനിതകൾക്ക് സ്കൂട്ടർ, തയ്യൽ മെഷീൻ, ഗൃഹോപകരണങ്ങൾ, കർഷകർക്ക് ജൈവവളം എന്നിവ വിതരണം ചെയ്യുമെന്ന് വാഗ്ദാനം നൽകി നാഷണൽ എൻ.ജി.ഒ. കോൺഫെഡറേഷൻ എന്ന സംഘടന പെരിന്തൽമണ്ണയിൽ നടത്തിയത് 2.5 കോടിയിലേറെ രൂപയുടെ തട്ടിപ്പ്.
മുദ്ര ചാരിറ്റബിൾ ഫൗണ്ടേഷൻ വഴി 168 പേരാണ് സ്കൂട്ടറിന്റെ പകുതി വിലയായ 60,000 രൂപ പണമടച്ച് സ്കൂട്ടർ കിട്ടാതെ കബളിപ്പിക്കപ്പെട്ടതിലുള്ളത്. ഒരു കോടി രൂപയിലേറെ വരും സ്കൂട്ടറിന്റെ പേരിൽ തട്ടിയ തുക മാത്രം. 316 പേർ ലാപ്ടോപ്പിനായി 20,000 രൂപയും അടച്ചിട്ടുണ്ട്.
24 പേർ തയ്യൽ മെഷീനിനും 24 പേർ ഗൃഹോപകരണങ്ങൾക്കും പണം അടച്ചിട്ടുണ്ട്. നാഷണൽ എൻ.ജി.ഒ. കോൺഫെഡറേഷൻ എന്ന സംഘടന നജീബ് കാന്തപുരം എം.എൽ.എ.യുടെ മുദ്ര ചാരിറ്റബിൾ ഫൗണ്ടേഷൻ വഴിയാണ് ആളുകളെ വിശ്വസിപ്പിച്ച് അപേക്ഷ സ്വീകരിക്കുകയും പണം തട്ടിയെടുക്കുകയും ചെയ്തിരിക്കുന്നത്.
കൂടാതെ കെ.എസ്.എസ്. അങ്ങാടിപ്പുറം എന്ന ഏജൻസി വഴി 96 പേരും താഴേക്കോട് കിസാൻ സർവീസ് സൊസൈറ്റി വഴി 40 പേരും സ്കൂട്ടറിനുള്ള പണം അടച്ച് കബളിപ്പിക്കപ്പെട്ടിട്ടുണ്ട്.
കെ.എസ്.എസ്. അങ്ങാടിപ്പുറം, താഴേക്കോട് കിസാൻ സർവീസ് സൊസൈറ്റിയും പോലീസിൽ പരാതി നൽകിട്ടുണ്ട്. മുദ്ര ചാരിറ്റബിൾ ഫൗണ്ടേഷൻ പണം വാങ്ങി വഞ്ചിച്ചതായി കാണിച്ച് മറ്റൊരു പരാതിയും പോലീസിൽ ലഭിച്ചിട്ടുണ്ട്.
………………………………………..
കൂടുതൽ വാർത്തകൾക്ക് www.perinthalmannaradio.com എന്ന ഞങ്ങളുടെ വെബ്സൈറ്റ് സന്ദര്ശിക്കുക
———————————————-
പെരിന്തൽമണ്ണയിലേയും പരിസര പ്രദേശങ്ങളിലേയും വാർത്തകൾ വാട്സാപ്പിൽ ലഭിക്കാൻ താഴെ കാണുന്ന ലിങ്കിൽ ക്ലിക് ചെയ്യുക
https://chat.whatsapp.com/Kw2z7JE7mRXJuiFDiLrY8H
———————————————
®Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ