പെരിന്തൽമണ്ണ നഗരസഭ ഇൻഡോർ മാർക്കറ്റിന്റെ രണ്ടാംഘട്ട നിർമാണ പ്രവൃത്തികൾ തുടങ്ങി

Perinthalmanna Radio
Date: 10-08-2024

പെരിന്തൽമണ്ണ; നഗരസഭയുടെ സ്വപ്‌ന പദ്ധതിയായ മോഡേൺ ഇൻഡോർ മാർക്കറ്റിന്റെ രണ്ടാം ഘട്ട നിർമാണ പ്രവൃത്തികൾ തുടങ്ങി. മുൻ നഗരസഭാ കൗൺസിലിന്റെ കാലത്ത് മുൻകൂർ ലേലത്തിലൂടെ തുക സമാഹരിച്ചാണ് 40 കോടി രൂപ ചെലവിൽ വിഭാവനം ചെയ്ത ആധുനിക മാർക്കറ്റിന്റെ നിർമാണം തുടങ്ങിയത്.

എന്നാൽ കോവിഡ് ഉൾപ്പെടെയുള്ള പ്രതിസന്ധികൾ വഴി മുടക്കുകയും നഗരസഭ കടുത്ത സാമ്പത്തിക പ്രതിസന്ധിയിലാവുകയും ചെയ്‌തതോടെ നിർമാണം വർഷങ്ങളോളം നിലച്ചു. മുറികൾ മുൻകൂർ ലേലം വിളിച്ചെടുത്ത വ്യാപാരികളും മറ്റും പ്രതിഷേധവുമായി രംഗത്തെത്തിയിരുന്നു.

ഒടുവിൽ നാലു വർഷത്തോളമായി നിലച്ചു കിടന്ന നിർമാണമാണ് പുനരാരംഭിച്ചത്. കേരള അർബൻ ആൻഡ് റൂറൽ ഡവലപ്മെന്റ് ഫിനാൻസ് കോർപ്പറേഷനിൽ (കെയുആർഡിഎഫ്‌സി) നിന്ന് 20 കോടി രൂപ വായ്‌പയെടുത്താണ് നിർമാണം വീണ്ടും ആരംഭിച്ചത്. മുൻപ് നഗരസഭയുടെ ഡെയ്‌ലി മാർക്കറ്റ് പ്രവർത്തിച്ചിരുന്ന 2.73 ഏക്കർ സ്ഥലത്താണ് ഇൻഡോർ മാർക്കറ്റിന്റെ നിർമാണം.

ഇതിനകം 40 ശതമാനം നിർമാണം മാത്രമാണ് പൂർത്തിയായത്. ഒന്നാം ഘട്ടത്തിൽ നിർമിച്ച കെട്ടിടത്തോട് ചേർന്ന് ദേശീയപാതയിൽ നിന്ന് പ്രവേശിക്കുന്ന ഭാഗത്താണ് രണ്ടാംഘട്ടം തുടങ്ങിയത്. ഊരാളുങ്കൽ ലേബർ കോൺട്രാക്‌ട് സൊസൈറ്റിയുട‌െ നേതൃത്വത്തിലാണ് നിർമാണം. കോൺക്രീറ്റിങ്, മണ്ണ് നീക്കൽ എന്നീ പ്രവൃത്തികളാണ് തുടങ്ങിയത്. മാർക്കറ്റിന്റെ നിർമാണം എത്രയും വേഗം പൂർത്തിയാക്കി നാ‌ടിന് സമർപ്പിക്കാനാവുമെന്ന് നഗരസഭാധ്യക്ഷൻ പി.ഷാജി അറിയിച്ചു.
………………………………………..
കൂടുതൽ വാർത്തകൾക്ക് www.perinthalmannaradio.com എന്ന ഞങ്ങളുടെ വെബ്സൈറ്റ് സന്ദര്‍ശിക്കുക
———————————————-
പെരിന്തൽമണ്ണയിലേയും പരിസര പ്രദേശങ്ങളിലേയും വാർത്തകൾ വാട്സാപ്പിൽ   ലഭിക്കാൻ താഴെ കാണുന്ന ലിങ്കിൽ ക്ലിക് ചെയ്യുക

https://chat.whatsapp.com/LGNq30ypgbfIwG3hGCsoS1
———————————————
®Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ