Perinthalmanna Radio
Date: 15-02-2026
പെരിന്തൽമണ്ണ: നഗരസഭയുടെ അടുത്ത സാമ്പത്തിക വർഷത്തേക്കുള്ള വികസന പദ്ധതികൾക്ക് തുടക്കമാകുന്നു. 2026-27 വാർഷിക പദ്ധതി രൂപീകരണത്തിന്റെ ഭാഗമായി നഗരസഭയിലെ 37 വാർഡുകളിലും വാർഡ് സഭകൾ സംഘടിപ്പിക്കാൻ തീരുമാനിച്ചു.
കഴിഞ്ഞ ദിവസം ചേർന്ന നഗരസഭയുടെ അടിയന്തര കൗൺസിൽ യോഗത്തിലാണ് ഇത് സംബന്ധിച്ച സുപ്രധാന തീരുമാനമെടുത്തത്. ഫെബ്രുവരി 21 മുതൽ 24 വരെയുള്ള നാല് ദിവസങ്ങളിലായി നഗരസഭയിലെ എല്ലാ വാർഡുകളിലും വാർഡ് സഭകൾ പൂർത്തിയാക്കും. ഓരോ വാർഡിലുമുള്ള വികസന ആവശ്യങ്ങൾ നേരിട്ട് മനസ്സിലാക്കാനും ജനകീയ പങ്കാളിത്തത്തോടെ പദ്ധതികൾ ആസൂത്രണം ചെയ്യാനുമാണ് ഇതിലൂടെ ലക്ഷ്യമിടുന്നത്.
വാർഡ് സഭകൾക്ക് ശേഷം മാർച്ച് മാസത്തിൽ വികസന സെമിനാർ സംഘടിപ്പിക്കാനും നഗരസഭ തീരുമാനിച്ചിട്ടുണ്ട്. നഗരസഭാ ചെയർപേഴ്സൺ പച്ചിരി സുരയ്യയുടെ അധ്യക്ഷതയിൽ ചേർന്ന യോഗത്തിൽ വൈസ് ചെയർമാൻ എ.പി. ഫസൽ മുഹമ്മദ്, വിവിധ സ്റ്റാന്റിംഗ് കമ്മിറ്റി അധ്യക്ഷന്മാരായ നാലകത്ത് ബഷീർ, ദിനേഷ് കണക്കഞ്ചേരി, പച്ചിരി ഹുസൈന നസീർ എന്നിവർ പങ്കെടുത്തു. നഗരത്തിന്റെ സമഗ്ര വികസനത്തിന് ഉതകുന്ന പുതിയ പദ്ധതികൾക്ക് ഈ വാർഡ് സഭകൾ രൂപം നൽകുമെന്നാണ് പ്രതീക്ഷിക്കുന്നത്.
………………………………………..
കൂടുതൽ വാർത്തകൾക്ക് www.perinthalmannaradio.com എന്ന ഞങ്ങളുടെ വെബ്സൈറ്റ് സന്ദര്ശിക്കുക
———————————————-
പെരിന്തൽമണ്ണയിലേയും പരിസര പ്രദേശങ്ങളിലേയും വാർത്തകൾ വാട്സാപ്പിൽ ലഭിക്കാൻ താഴെ കാണുന്ന ലിങ്കിൽ ക്ലിക് ചെയ്യുക
https://chat.whatsapp.com/FXWqNeniWKuCY5QVi7FWIs
———————————————
®Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ