Perinthalmanna Radio
Date: 18-05-2025
പെരിന്തൽമണ്ണ: നഗരസഭയിലെ 100 കുടുംബങ്ങളിൽ മട്ടുപ്പാവ് കൃഷിക്ക് പദ്ധതി. കുടുംബശ്രീ ദിനാചരണത്തോടനുബന്ധിച്ച് കുടുംബശ്രീ സിഡിഎസിനു കീഴിലാണ് മട്ടുപ്പാവ് കൃഷി പദ്ധതിക്കു തുടക്കമായത്. പദ്ധതിയുടെ ഭാഗമായി മൺചട്ടികൾ, തൈകൾ, വളങ്ങൾ, പ്രത്യേകം തയാറാക്കിയ മണ്ണ് എന്നിവയുടെ വിതരണോദ്ഘാടനം നഗരസഭാധ്യക്ഷൻ പി.ഷാജി നിർവഹിച്ചു. കുടുംബശ്രീ സിഡിഎസ് ചെയർപഴ്സൻ പി.കെ.സീനത്ത് ആധ്യക്ഷ്യം വഹിച്ചു. നഗര മേഖലയിൽ ജൈവകൃഷി പ്രോത്സാഹിപ്പിക്കുന്നതിന്റെ ഭാഗമായി കുടുംബശ്രീ ജില്ലാ മിഷൻ വിഭാവനം ചെയ്തതാണ് പദ്ധതി. നഗര മേഖലയിൽ കൃഷിക്ക് അനുയോജ്യമായ സ്ഥലം ആവശ്യത്തിന് ലഭ്യമല്ലാത്ത സാഹചര്യത്തിലാണ് പുതിയ പദ്ധതി. ഒരു ഗുണഭോക്താവിന് 25 മൺചട്ടികളും വഴുതന, മുളക്, തക്കാളി എന്നിവയുടെ തൈകളും, ആവശ്യമായ ജൈവ വളവും മണ്ണും പദ്ധതിയുടെ ഭാഗമായി വീടുകളിലേക്ക് എത്തിച്ച് നൽകും. കൂടാതെ നൂതന കാർഷിക രീതിയെക്കുറിച്ച് പരിശീലനവും ലഭ്യമാക്കും. സ്ഥിര സമിതി അധ്യക്ഷരായ മുണ്ടുമ്മൽ മുഹമ്മദ്‌ ഹനീഫ, അമ്പിളി മനോജ്, കൗൺസിലർമാരായ എൻ.അജിത, കെ.സി.ഷാഹുൽ ഹമീദ്, സി.പി.ഷെർലിജ, എ.ശ്രീജിഷ, കൃഷ്ണ പ്രിയ, സിറ്റി മിഷൻ മാനേജർ സുബൈറുൽ അവാൻ, ബ്ലോക്ക് കോഓർഡിനേറ്റർ ജിനി അവിനാഷ്, ഉപസമിതി കൺവീനർമാരായ കെ.ശ്രീജ, എ.വസന്തകുമാരി, സി.ഉഷ, സിഡിഎസ് അക്കൗണ്ടന്റ് പി.ജിഷ തുടങ്ങിയവർ പ്രസംഗിച്ചു.
®Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ