Perinthalmanna Radio
Date: 23-12-2024
മലപ്പുറം: പാൽപ്പൊടി നിർമാണ ഫാക്ടറിയുമായി മിൽമ മലബാർ യൂണിയൻ. മങ്കട, മൂർക്കനാട് 12.4 ഏക്കറിൽ ഡയറി പ്ലാന്റിനോടു ചേർന്നാണ് 131.3 കോടി രൂപ ചെലവിൽ മലപ്പുറം ഡെയറിയും പാൽപ്പൊടി ഫാക്ടറിയും നിർമിച്ചതെന്ന് മിൽമ ചെയർമാൻ കെ.എസ്. മണി പറഞ്ഞു. മിൽമയുടെ ഏക പാൽപ്പൊടി ഫാക്ടറിയാണിത്. ഡെയറിയും ഫാക്ടറിയും നാളെ വൈകീട്ട് നാലിന് മുഖ്യമന്ത്രി പിണറായി വിജയൻ ഉദ്ഘാടനം ചെയ്യും.
131.3 കോടി രൂപയിൽ 15 കോടി സംസ്ഥാന ക്ഷീരവികസന വകുപ്പിന്റെ വിഹിതമാണ്. 32.72 കോടി നബാർഡ് ഗ്രാമീണ അടിസ്ഥാന സൗകര്യ വികസന ഫണ്ടിൽ നിന്ന് കിട്ടി. ബാക്കി മിൽമ മലബാർ മേഖലാ യൂണിയന്റെ വിഹിതമാണ്.
കേരളത്തിലെ ഏറ്റവും വലുതും അത്യാധുനിക സാങ്കേതികവിദ്യയോടുകൂടി പ്രവർത്തിക്കുന്നതുമാണ് മിൽമ പാൽപ്പൊടി നിർമാണ ഫാക്ടറി. 10 ടണ്ണാണ് ഉത്പാദന ക്ഷമത. ദിവസം ഒരു ലക്ഷം ലിറ്റർ പാൽ പൊടിയാക്കി മാറ്റാം. പാലിൽ നിന്ന് കൂടുതൽ കാലം കേടുകൂടാതിരിക്കുന്ന മൂല്യവർധിത ഉത്പന്നങ്ങളും ഉയർന്ന പോഷക ഘടകങ്ങളടങ്ങിയ ഉത്പന്നങ്ങളും നൂതനമായ പാലിതര ഉത്പന്നങ്ങളും ഇവിടെ നിർമിക്കാനാകും. ഫാക്ടറി വരുന്നതോടെ കേരളത്തിലെ ക്ഷീരകർഷകർ ഉത്പാദിപ്പിക്കുന്ന മുഴുവൻ പാലിനും വിപണി കണ്ടെത്താനാകും. ലക്ഷക്കണക്കിനു രൂപയുടെ നികുതി വരുമാനം സർക്കാരിനു ലഭിക്കും. പ്രത്യക്ഷമായും പരോക്ഷമായും നൂറിൽപ്പരം തൊഴിൽ ദിനങ്ങൾ സൃഷ്ടിക്കപ്പെടും. 25 കിലോ, 10 കിലോ, ഒരുകിലോ, 500 ഗ്രാം, 200 ഗ്രാം, 50 ഗ്രാം, 20 ഗ്രാം എന്നിങ്ങനെ വിവിധ അളവുകളിൽ മിൽമ ഡെയറി വൈറ്റ്നർ വൈകാതെ വിപണിയിൽ ലഭ്യമാകും.
………………………………………..
കൂടുതൽ വാർത്തകൾക്ക് www.perinthalmannaradio.com എന്ന ഞങ്ങളുടെ വെബ്സൈറ്റ് സന്ദര്‍ശിക്കുക
———————————————-
പെരിന്തൽമണ്ണയിലേയും പരിസര പ്രദേശങ്ങളിലേയും വാർത്തകൾ വാട്സാപ്പിൽ ലഭിക്കാൻ താഴെ കാണുന്ന ലിങ്കിൽ ക്ലിക് ചെയ്യുക
https://chat.whatsapp.com/G1EZoPPO7BGKJcREbdUair
———————————————
®Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ