അങ്ങാടിപ്പുറത്ത് വരി മറികടന്നുവന്ന  ബസിനെ പിന്നോട്ടിറക്കിച്ച് പോലീസ്

Perinthalmanna Radio
Date: 13-04-2023

അങ്ങാടിപ്പുറം: വാഹനങ്ങൾ ഗതാഗതക്കുരുക്കിൽപ്പെട്ടുകിടക്കുമ്പോൾ വരി തെറ്റിച്ച്‌ കയറിവന്ന സ്വകാര്യ ബസ് എത്തിയത് ഡിവൈ.എസ്.പി.യുടെ മുൻപിലേക്ക്. ഉടനുണ്ടായി നടപടി. വണ്ടി നേരേ റിവേഴ്സ്. പിന്നോട്ടുപോയി മറ്റു വാഹനങ്ങളുടെ പിറകിലായി സ്ഥാനം പിടിച്ച ബസ് പിന്നെ പോയത് വരിയിലെ അച്ചടക്കം പാലിച്ച്.

മലപ്പുറം ഭാഗത്തുനിന്ന് പെരിന്തൽമണ്ണ ഭാഗത്തേക്ക് പോകുന്ന വാഹനങ്ങൾ ഗതാഗതക്കുരുക്കിൽപ്പെട്ട് ഏറെ പതുക്കെയാണ് മുന്നോട്ടുപോയിരുന്നത്. അതിനിടയ്ക്ക് മഞ്ചേരിയിൽനിന്ന്് പെരിന്തൽമണ്ണയിലേക്ക് വരികയായിരുന്ന ബസാണ് തളി ക്ഷേത്രത്തിനു മുൻവശത്ത് നിര തെറ്റിച്ച് മറ്റു വാഹനങ്ങളെ മറികടന്ന് മുന്നിലേക്ക് കയറാൻ ശ്രമിച്ചത്. ഇതു കണ്ട് ഔദ്യോഗിക വാഹനത്തിൽ മലപ്പുറത്തേക്ക് പോകുകയായിരുന്ന പെരിന്തൽമണ്ണ ഡിവൈ.എസ്.പി. എം. സന്തോഷ്‌കുമാർ വാഹനത്തിൽ നിന്നിറങ്ങി. അദ്ദേഹത്തിന്റെ കൂടെയുണ്ടായിരുന്ന മറ്റു രണ്ട് പോലീസുകാരും ചേർന്ന് ബസിനെ പിന്നോട്ട് എടുപ്പിക്കുകയായിരുന്നു.

ഗതാഗതക്കുരുക്കുണ്ടാകുമ്പോൾ വരിയിൽ നിൽക്കാതെ മറ്റു വാഹനങ്ങളെ മറികടന്ന് മുന്നിലേക്ക് നീങ്ങി എതിർദിശയിൽനിന്ന് വരുന്ന വാഹനങ്ങൾക്കും പ്രയാസമുണ്ടാക്കുന്ന സ്വകാര്യ ബസുകളുടെ നീക്കം ദേശീയപാതയിൽ നിത്യസംഭവമാണ്. കഴിഞ്ഞ മാസം മേൽപ്പാലത്തിൽ നിര മറികടന്നുപോയ ബസിനെ മറ്റു വാഹനങ്ങളിലെ യാത്രക്കാർ ഇറങ്ങി പിന്നോട്ട് എടുപ്പിച്ച സംഭവമുണ്ടായി.

അങ്ങാടിപ്പുറത്ത് മിക്ക ദിവസങ്ങളിലും രൂക്ഷമായ ഗതാഗതക്കുരുക്കാണ്. തളി ജങ്ഷനിലും മേൽപ്പാലത്തിനു താഴെയും അമ്പലപ്പടിയിലും ട്രാഫിക് പോലീസിന്റെ സേവനമുണ്ട്. ട്രാഫിക് പോലീസ് ഇല്ലാത്ത സ്ഥലത്താണ് ഇത്തരം സംഭവങ്ങൾ നടക്കുന്നത്. ഇത് ഗതാഗതക്കുരുക്ക് കൂടുതൽ രൂക്ഷമാകാനും മറ്റുള്ള വാഹനങ്ങൾക്ക് പ്രയാസമുണ്ടാക്കാനും കാരണമാകുന്നു.
…………………………………………
കൂടുതൽ വാർത്തകൾക്ക് www.perinthalmannaradio.com എന്ന ഞങ്ങളുടെ വെബ്സൈറ്റ് സന്ദര്‍ശിക്കുക
———————————————-
പെരിന്തൽമണ്ണയിലേയും പരിസര പ്രദേശങ്ങളിലേയും വാർത്തകൾ വാട്സാപ്പിൽ   ലഭിക്കാൻ താഴെ കാണുന്ന ലിങ്കിൽ ക്ലിക് ചെയ്യുക

https://chat.whatsapp.com/E2dEC1CYZr68WrVmzEEgSL
———————————————
®Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ