കളക്ടറേറ്റിൽ ബയോമെട്രിക് പഞ്ചിങ്; ഈ മാസം തന്നെ നടപ്പാക്കും

Perinthalmanna Radio
Date: 04-01-2023

മലപ്പുറം: ഈ മാസം തന്നെ കളക്ടറേറ്റിലെ ജീവനക്കാരുടെ ഹാജർ ബയോമെട്രിക് പഞ്ചിങ് സംവിധാനത്തിലേക്കു മാറും. പത്തിനു തീർക്കണമെന്ന് നടത്തിപ്പ് ചുമതലയുള്ള കെൽട്രോണിനോട് ജില്ലാ ഭരണകൂടം ആവശ്യപ്പെട്ടിട്ടുണ്ട്.

മറ്റു ജില്ലകളിലും കെൽട്രോണിനു കരാർ ഉള്ളതിനാൽ കളക്ടറേറ്റിൽ പത്തിനുള്ളിൽ പൂർത്തിയാക്കുക ബുദ്ധിമുട്ടാണ്. എത്രയുംവേഗം ചെയ്തു തീർക്കണമെന്ന് കെൽട്രോണിനോട് ആവശ്യപ്പെട്ടിട്ടുണ്ടെന്ന് എ.ഡി.എം. എം. മെഹറലി പറഞ്ഞു.

സിവിൽ സ്റ്റേഷനിൽ പി.ഡബ്ല്യു.ഡി. ഇലക്ട്രോണിക്‌സ് വിഭാഗത്തിനാണ് ബയോെമട്രിക് പഞ്ചിങ് സംവിധാനം നടപ്പാക്കാനുള്ള ചുമതല. സിവിൽസ്റ്റേഷനിലും ജനുവരിയിൽത്തന്നെ പൂർത്തിയാക്കാനുള്ള ശ്രമത്തിലാണ്. സിവിൽ സ്റ്റേഷനിലെ എല്ലാ ഓഫീസുകളിലും ആധാർ അധിഷ്ഠിത സ്പാർക് ബന്ധിത ബയോമെട്രിക് അറ്റൻഡൻസ് സംവിധാനം ഒരുക്കുന്നതിനു പ്ലാൻ ഫണ്ടിൽനിന്ന് രണ്ടു മാസം മുൻപ് 18,56,714 രൂപ അനുവദിച്ചിരുന്നു.

മാർച്ച് 31-നകം എല്ലാ സർക്കാർ ഓഫീസുകളിലും ബയോമെട്രിക് സംവിധാനം നടപ്പാക്കണമെന്ന സർക്കാർ നിർദേശത്തിന്റെ അടിസ്ഥാനത്തിൽ ജില്ലയിൽ ആദ്യഘട്ടത്തിൽ കളക്ടറേറ്റിലാണ്‌ ആധാർ അധിഷ്ഠിത പഞ്ചിങ് സംവിധാനം ഏർപ്പെടുത്തുന്നത്. കോവിഡിനു മുൻപ് കളക്ടറേറ്റിൽ പഞ്ചിങ് സംവിധാനം നിലവിലുണ്ടായിരുന്നെങ്കിലും ആധാറുമായി ബന്ധിപ്പിച്ചിരുന്നില്ല.

പുതിയ സംവിധാനം നിലവിൽവരുന്നതോടെ ജീവനക്കാരുടെ ഹാജരും ശമ്പളവുമായി ബന്ധിപ്പിക്കും. പഞ്ചിങ് നടപ്പാക്കുന്നതിനു മുന്നോടിയായി ജീവനക്കാരുടെ ആധാർ അധിഷ്ഠിത ഡേറ്റാ ബേസ് തയ്യാറാക്കുന്നത് ആരംഭിച്ചിട്ടുണ്ട്.

നാഷണൽ ഇൻഫർമാറ്റിക്‌സ് സെന്റർ (എൻ.ഐ.സി.) വഴിയാണു ഡേറ്റാബേസ് തയാറാക്കുന്നത്. ഡേറ്റാബേസിൽ പേരും മറ്റു വിവരങ്ങളും ചേർത്ത് രജിസ്റ്റർ ചെയ്യുന്നതിനായി ജീവനക്കാർക്ക് പരിശീലനം നൽകി.
———————————————-
പെരിന്തൽമണ്ണയിലേയും പരിസര പ്രദേശങ്ങളിലേയും വാർത്തകൾ വാട്സാപ്പിൽ   ലഭിക്കാൻ താഴെ കാണുന്ന ലിങ്കിൽ ക്ലിക് ചെയ്യുക

https://chat.whatsapp.com/BYcevSuLs0dH5STbBgvWwr
———————————————
®Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ