Perinthalmanna Radio
Date: 19-12-2022
പട്ടിക്കാട്: ലോകകപ്പ് ഫുട്ബോളിന് ഖത്തറിൽ തിരശ്ശീല വീഴുമ്പോൾ ജില്ലയിൽ സെവൻസ് ഫുട്ബോൾ ആവേശത്തിന് ആരവമുയരുന്നു. ജില്ലയിലെ ഏറ്റവും പഴക്കമേറിയ ഫുട്ബോൾ ടൂർണമെന്റുകളിലൊന്നായ കാദറലി അഖിലേന്ത്യാ സെവൻസ് ഫുട്ബോളിന് തിങ്കളാഴ്ച പട്ടിക്കാട് ഗവ. ഹൈസ്കൂൾ മൈതാനത്ത് തുടക്കമാവും.
കാദറലി ക്ലബ്ബിന്റെ നേതൃത്വത്തിലുള്ള കാദറലി അഖിലേന്ത്യാ സെവൻസ് ഫുട്ബോളിന്റെ അൻപതാം വാർഷികം കൂടിയാണ് ഈ വർഷം. കേരളത്തിലെ മികച്ച 25 ടീമുകൾ മാറ്റുരയ്ക്കുന്ന ടൂർണമെന്റ് തിങ്കളാഴ്ച രാത്രി 7.30-ന് പി. അബ്ദുൾഹമീദ് എം.എൽ.എ. ഉദ്ഘാടനം ചെയ്യും. ലിൻഷ മണ്ണാർക്കാടും ലക്കിസോക്കർ കോട്ടപ്പുറവും തമ്മിലാണ് ആദ്യ മത്സരം.
ടൂർണമെന്റിന്റെ വിളംബരമറിയിച്ച് കൊണ്ട് ഞായറാഴ്ച നടന്ന ഘോഷയാത്ര പട്ടിക്കാട് മിനി ആശുപത്രിക്ക് മുമ്പിൽനിന്നു തുടങ്ങി പട്ടിക്കാട് സ്കൂൾ മൈതാനത്ത് സമാപിച്ചു. പി.ടി.എ. പ്രസിഡന്റ് അസീസ് പട്ടിക്കാട്, ക്ലബ്ബ് ട്രഷറർ മണ്ണിൽ ഹസ്സൻ, പച്ചീരി ഫാറൂഖ്, സി.എച്ച്. മുസ്തഫ, അസീസ് മണ്ണേങ്ങൽ, കുറ്റീരി മാനുപ്പ, എച്ച്. മുഹമ്മദ് ഖാൻ, യൂസുഫ് രാമപുരം, ഇ.കെ. സലീം, എം.കെ. കുഞ്ഞയമ്മു എന്നിവർ നേതൃത്വം നൽകി. അയ്യായിരം പേർക്കിരുന്ന് കളികാണാവുന്ന സൗകര്യമാണ് സ്റ്റേഡിയത്തിൽ ഒരുക്കിയിരിക്കുന്നത്.
പെരിന്തൽമണ്ണയിലേയും പരിസര പ്രദേശങ്ങളിലേയും വാർത്തകൾ വാട്സാപ്പിൽ ലഭിക്കാൻ താഴെ കാണുന്ന ലിങ്കിൽ ക്ലിക് ചെയ്യുക
https://chat.whatsapp.com/FI3ej2Q2HPOAVXXzE9Z7oK
®Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ