Perinthalmanna Radio
Date: 15-01-2023
പെരിന്തൽമണ്ണ: ആശുപത്രിയിലേക്കു മാറ്റാനെത്തിയ ആംബുലൻസ് ജീവനക്കാരുടെ സഹായത്തോടെ ആദിവാസി യുവതിക്ക് വീട്ടിൽ സുഖപ്രസവം. പെരിന്തൽമണ്ണ താഴേക്കോട് അരക്കുപറമ്പ് ആദിവാസി കോളനിയിലെ ശോഭ (26) ആണ് വീട്ടിൽ പെൺകുഞ്ഞിനു ജന്മം നൽകിയത്. ഇന്നലെ രാവിലെ 9ന് ആയിരുന്നു സംഭവം. ശോഭയ്ക്ക് പ്രസവ വേദന അനുഭവപ്പെട്ടതിനെ തുടർന്നു വീട്ടുകാർ ട്രൈബൽ പ്രമോട്ടർ മണികണ്ഠനെ വിവരം അറിയിക്കുകയും കനിവ് 108 ആംബുലൻസിന്റെ സേവനം തേടുകയുമായിരുന്നു.
കൺട്രോൾ റൂമിൽനിന്ന് സന്ദേശം പെരിന്തൽമണ്ണ ജില്ലാ ആശുപത്രിയിലെ കനിവ് 108 ആംബുലൻസിനു കൈമാറി. ഉടൻ ആംബുലൻസ് പൈലറ്റ് പി.ഫഹദ് അലി, എമർജൻസി മെഡിക്കൽ ടെക്നിഷ്യൻ പി.സജീർ എന്നിവർ കോളനിയിലെത്തി.എമർജൻസി മെഡിക്കൽ ടെക്നിഷ്യൻ സജീറിന്റെ പരിശോധനയിൽ പ്രസവം അടുത്തെന്നു മനസ്സിലായതോടെ, ആംബുലൻസിലേക്കു മാറ്റുന്നത് സുരക്ഷിതമല്ലെന്ന് മനസ്സിലാക്കി വീട്ടിൽത്തന്നെ പ്രസവത്തിനുള്ള സജ്ജീകരണങ്ങൾ ഒരുക്കുകയായിരുന്നു. ആശാ വർക്കർ ജുമൈദയും സഹായം ഒരുക്കി. 9.46ന് ശോഭ കുഞ്ഞിനു ജന്മം നൽകി. തുടർന്ന് ആവശ്യമായ പ്രഥമ ശുശ്രൂഷ നൽകി ആംബുലൻസിൽ ജില്ലാ ആശുപത്രിയിലേക്കു മാറ്റി. അമ്മയും കുഞ്ഞും സുഖമായിരിക്കുന്നതായി ബന്ധുക്കൾ അറിയിച്ചു.
———————————————-
പെരിന്തൽമണ്ണയിലേയും പരിസര പ്രദേശങ്ങളിലേയും വാർത്തകൾ വാട്സാപ്പിൽ ലഭിക്കാൻ താഴെ കാണുന്ന ലിങ്കിൽ ക്ലിക് ചെയ്യുക
https://chat.whatsapp.com/BYcevSuLs0dH5STbBgvWwr
———————————————
®Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ