ഇ പോസ് തകരാറ് ഇനി ജില്ലയിലെ റേഷൻ വിതരണം പ്രതിസന്ധിയിലാക്കില്ല

Perinthalmanna Radio
Date: 07-05-2023

പെരിന്തൽമണ്ണ ∙ ഇ പോസ് മെഷീനുകളുടെ തകരാറ് ഇനി ജില്ലയിൽ റേഷൻ വിതരണം പ്രതിസന്ധിയിലാക്കില്ല. മുഴുവൻ റേഷൻ കടകളിലെയും ഇ പോസ് മെഷീനുകൾ ടെക്‌നിഷ്യൻമാർ പരിശോധിച്ചു. ജില്ലാ സപ്ലൈ ഓഫിസ് അധികൃതരുടെ നിർദേശപ്രകാരം അതത് താലൂക്ക് സപ്ലൈ ഓഫിസുകളിലെത്തിച്ചാണ് ടെക്‌നിഷ്യന്മാർ പരിശോധന നടത്തി തകരാറ് പരിഹരിച്ചത്. കണക്‌ടിവിറ്റി തകരാറുകൾക്കും സാങ്കേതിക തകരാറുകൾക്കുമൊപ്പം ചില റേഷൻ കടകളിൽ ഇ പോസ് മെഷീനുകളുടെ തകരാറുകളും പ്രതിസന്ധി സൃഷ്‌ടിച്ചിരുന്നു. ഏറനാട്(176), നിലമ്പൂർ(225), പെരിന്തൽമണ്ണ(171), തിരൂർ(266), തിരൂരങ്ങാടി(151), പൊന്നാനി(127), കൊണ്ടോട്ടി(121) എന്നിങ്ങനെ 1237 ഇ പോസ് മെഷീനുകൾ പരിശോധിച്ചു.

ഒരു ദിവസം 2 പഞ്ചായത്തുകളിൽ നിന്നുള്ള റേഷൻ കടകളിലെ മെഷീനുകൾ എന്ന ക്രമത്തിലാണ് ദിവസങ്ങളോളം എടുത്ത് പരിശോധന പൂർത്തിയാക്കി മെഷീനുകൾ ഉപയോഗയോഗ്യമാണെന്ന് ഉറപ്പാക്കിയത്. മെഷീൻ സ്ഥാപിച്ച വിഷൻ ടെക് എന്ന സ്ഥാപനത്തിന്റെ ഓരോ ടെക്‌നിഷ്യൻമാർ വീതം എല്ലാ താലൂക്ക് സപ്ലൈ ഓഫിസുകളിലും നിലവിലുണ്ട്. തകരാറുകൾ യഥാസമയം പരിഹരിക്കുന്നതിന് വേണ്ടിയാണ് ഇത്. അതേ സമയം ഇ പോസുമായി ബന്ധപ്പെട്ട കണക്‌ടിവിറ്റി തകരാറുകൾക്കും സെർവർ തകരാറുകൾ ഉൾപ്പെടെയുള്ള മറ്റ് സാങ്കേതിക തകരാറുകൾക്കും ഇതുകൊണ്ട് പരിഹാരം കാണാനാകില്ല.
…………………………………………
കൂടുതൽ വാർത്തകൾക്ക് www.perinthalmannaradio.com എന്ന ഞങ്ങളുടെ വെബ്സൈറ്റ് സന്ദര്‍ശിക്കുക
———————————————-
പെരിന്തൽമണ്ണയിലേയും പരിസര പ്രദേശങ്ങളിലേയും വാർത്തകൾ വാട്സാപ്പിൽ   ലഭിക്കാൻ താഴെ കാണുന്ന ലിങ്കിൽ ക്ലിക് ചെയ്യുക

https://chat.whatsapp.com/D0DhxRdTjOQ5CuMBUmEPjg
———————————————
®Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ