കൊടികുത്തിമലയിൽ ഒരു കോടിയുടെ വികസന പദ്ധതികൾ ഉടൻ പൂർത്തിയാക്കും

Perinthalmanna Radio
Date: 29-12-2022

പെരിന്തൽമണ്ണ: പ്രകൃതി സൗഹൃദ വിനോദ സഞ്ചാരകേന്ദ്രമായ കൊടികുത്തിമലയുടെ വികസനത്തിനുള്ള പ്രത്യേക പദ്ധതികൾ ഉടൻ പൂർത്തിയാക്കും.

കേന്ദ്ര വനം വകുപ്പ് അനുവദിച്ച 60 ലക്ഷം രൂപയും വനസംരക്ഷണ സമിതിയിൽനിന്നുള്ള 40 ലക്ഷം രൂപയും ഉപയോഗിച്ചുള്ള പ്രവൃത്തികൾ വേഗത്തിൽ പൂർത്തിയാക്കാൻ ബുധനാഴ്ച കൊടികുത്തിമലയിൽ ചേർന്ന പ്രത്യേക വികസന യോഗം തീരുമാനിച്ചു.

സഞ്ചാരികൾക്ക് ഉപയോഗിക്കുന്നതിന് ഹട്ടുകൾ, കോട്ടേജുകൾ, ആംഫി തിയേറ്റർ, പ്രവേശനകവാടം നവീകരണം, ടോയ്‌െലറ്റ് ബ്ലോക്ക് നിർമാണം, കുടിവെള്ളസംവിധാനം തുടങ്ങിയ പ്രവൃത്തികളാണ് ആദ്യഘട്ടത്തിൽ പൂർത്തിയാക്കുക.

ഗസ്റ്റ് ഹൗസ്, കോഫി ഷോപ്പ്, റെസ്റ്റോറന്റ് എന്നിവയുടെ പ്രവൃത്തി പുരോഗമിക്കുകയാണ്. ഇതിനു പുറമേയാണ് ഒരു കോടി രൂപ ഉപയോഗിച്ചുള്ള പ്രവൃത്തികൾ തുടങ്ങുന്നത്. കൊടികുത്തിമലയിലെ റോഡ് നവീകരണത്തിനായി 25 ലക്ഷം രൂപ അനുവദിക്കുമെന്ന് നജീബ് കാന്തപുരം എം.എൽ.എ. യോഗത്തിൽ അറിയിച്ചു. വിവിധ പരിശീലന പരിപാടികളും ക്യാമ്പുകളും സംഘടിപ്പിക്കുന്നതിനുള്ള സൗകര്യങ്ങളും ഇരിപ്പിടങ്ങളും സൗന്ദര്യവത്കരണ പ്രവൃത്തികളും പൂർത്തീകരിച്ച് കൊടികുത്തിമലയെ കേരളത്തിലെ പ്രധാന ടൂറിസം കേന്ദ്രമാക്കി മാറ്റുമെന്ന് എം.എൽ.എ. പറഞ്ഞു.

പുതിയ പദ്ധതികൾ നടപ്പാക്കുന്നതിനു മുന്നോടിയായാണ് എം.എൽ.എ.യുടെയും ജില്ലാ ഫോറസ്റ്റ് ഓഫീസർ പ്രവീണിന്റെയും നേതൃത്വത്തിൽ കൊടികുത്തിമലയിൽ യോഗം ചേർന്നത്.

പെരിന്തൽമണ്ണ ബ്ലോക്ക് പഞ്ചായത്ത് പ്രസിഡന്റ് എ.കെ. മുസ്തഫ, താഴേക്കോട് പഞ്ചായത്ത് മുൻ പ്രസിഡന്റ് എ.കെ. നാസർ, വനംസംരക്ഷണസമിതിയംഗം ഹുസൈൻ കളപ്പാടൻ തുടങ്ങിയവർ പങ്കെടുത്തു.
———————————————-
പെരിന്തൽമണ്ണയിലേയും പരിസര പ്രദേശങ്ങളിലേയും വാർത്തകൾ വാട്സാപ്പിൽ   ലഭിക്കാൻ താഴെ കാണുന്ന ലിങ്കിൽ ക്ലിക് ചെയ്യുക

https://chat.whatsapp.com/BYcevSuLs0dH5STbBgvWwr
——————————————–
®Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ