സംശയിച്ചത് ഭക്ഷ്യ വിഷബാധ; വില്ലനായത് നോറോ വൈറസ്

Perinthalmanna Radio
Date: 05-02-2023

പെരിന്തൽമണ്ണ: സ്വകാര്യ നഴ്സിങ് സ്ഥാപനത്തിലെ വിദ്യാർഥികളിൽ ചിലർക്ക് കൂട്ടമായി ഛർദിയും വയറിളക്കവും ബാധിച്ച് വിവിധ ആശുപ്രതികളിൽ ചികിത്സ തേടിയപ്പോൾ ആദ്യം സംശയിച്ചത് ഭക്ഷ്യ വിഷ ബാധയാണോയെന്ന്. ഇതോടെ ഇവിടത്തെ ഭക്ഷണശാല അടച്ചു. വെള്ളം പരിശോധിച്ചപ്പോൾ പ്രശ്നം കണ്ടതുമില്ല. തുടർന്ന് നടത്തിയ മെഡിക്കൽ ക്യാംപിലൂടെ ശേഖരിച്ച സാംപിളുകളിൽ ഒന്നിലാണ് തിരുവനന്തപുരത്തെ ലാബിൽ നിന്ന് നോറോ വൈറസ് സ്ഥിരീകരിച്ചത്. ജനുവരി 20 മുതലാണ് വിദ്യാർഥികൾക്ക് പ്രശ്നങ്ങൾ തുടങ്ങിയത്. കഴിഞ്ഞ ആഴ്ചയാണ് മെഡിക്കൽ ക്യാംപ് നടത്തിയത്. സാംപിളുകൾ ആദ്യം മഞ്ചേരി മെഡിക്കൽ കോളേജിലും നോറോ സംശയം തോന്നിയത് തിരുവനന്തപുരത്തേക്കും അയയ്ക്കുക ആയിരുന്നു. ഇന്നലെയും സ്ഥാപനത്തിൽ മെഡിക്കൽ ക്യാംപ് സംഘടിപ്പിച്ചു. 10 പേരുടെ സാംപിളുകൾ പരിശോധനയ്ക്ക് അയച്ചിട്ടുണ്ട്. ഇവയുടെ ഫലം മൂന്നോ നാലോ ദിവസത്തിനുള്ളിൽ ലഭിക്കും.

ബോധവൽക്കരണം ശക്തമാക്കി

ജില്ലയിൽ നോറോ വൈറസ് സ്ഥിരീകരിച്ച സാഹചര്യത്തിൽ ആരോഗ്യ വകുപ്പിന്റെ നേതൃത്വത്തിൽ പ്രതിരോധ ബോധവൽക്കരണം ശക്തമാക്കി. ആരോഗ്യ വകുപ്പിൽ നിന്നുള്ള സംഘം സ്ഥാപനത്തിൽ സന്ദർശനം നടത്തി. സൂപ്പർ ക്ലോറിനേഷൻ ഉൾപ്പെടെയുള്ള പ്രവർത്തനങ്ങൾ നടക്കുന്നു. രോഗ ലക്ഷണങ്ങൾ ഉള്ളവരോട് നിരീക്ഷണത്തിൽ തുടരാൻ നിർദേശിച്ചു

എന്താണ് നോറോ വൈറസ്

ഉദര സംബന്ധമായ അസുഖം ഉണ്ടാക്കുന്ന ഒരു കൂട്ടം വൈറസുകളാണ് നോറോ വൈറസുകൾ. ആമാശയത്തിന്റെയും കുടലിന്റെയും ആവരണത്തിന്റെ വീക്കത്തിനും കടുത്ത ഛർദി, വയറിളക്കം എന്നിവയ്ക്കും കാരണമാകുന്നു. പകർച്ചാ ശേഷി കൂടുതലാണ്.

രോഗം പകരുന്നതെങ്ങനെ?

മലിനമായ ജലത്തിലൂടെയും, ഭക്ഷണത്തിലൂടെയുമാണ് പകരുന്നത്. രോഗിയുമായി നേരിട്ടുള്ള സമ്പർക്കത്തിലുടെയും വിസർജ്യം, ഛർദ്ദിൽ എന്നിവ വഴിയും എന്നിവ വഴിയും വൈറസ് പടരും.

ലക്ഷണങ്ങൾ

വയറിളക്കം, വയറു വേദന, ഛർദി, മനംപുരട്ടൽ, പനി, തലവേദന, ശരീര വേദന തുടങ്ങിയവയാണ് ലക്ഷണങ്ങൾ. നിർജലീകരണം സംഭവിച്ചാൽ സ്ഥിതി ഗുരുതരമാകും.

രോഗം ബാധിച്ചാൽ എന്ത് ചെയ്യണം?

വൈറസ് ബാധിതർ ഡോക്ടറുടെ നിർദേശാനുസരണം വിശ്രമിക്കണം. ഒആർഎസ് ലായനി, തിളപ്പിച്ചാറ്റിയ വെള്ളം എന്നിവ നന്നായി കുടിക്കണം. ആവശ്യമെങ്കിൽ ചികിത്സ ലഭ്യമാക്കണം. രോഗം മാറി 2 ദിവസങ്ങൾ വരെ വൈറസ് പടരാം. അതിനാൽ ഭേദമായാലും 2 ദിവസം കഴിഞ്ഞ പുറത്തിറങ്ങാവൂ.
…………………………………………
കൂടുതൽ വാർത്തകൾക്ക് www.perinthalmannaradio.com എന്ന ഞങ്ങളുടെ വെബ്സൈറ്റ് സന്ദര്‍ശിക്കുക
———————————————-
പെരിന്തൽമണ്ണയിലേയും പരിസര പ്രദേശങ്ങളിലേയും വാർത്തകൾ വാട്സാപ്പിൽ   ലഭിക്കാൻ താഴെ കാണുന്ന ലിങ്കിൽ ക്ലിക് ചെയ്യുക

https://chat.whatsapp.com/BuEppF2WClmF172FMFIJJx
———————————————
®Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ