വൈലോങ്ങര – ഓരാടംപാലം ബൈപാസ്; ഇനി വേണ്ടത് ഭൂമി ഏറ്റെടുക്കാൻ പണം

Perinthalmanna Radio
Date: 05-04-2023

അങ്ങാടിപ്പുറം: അങ്ങാടിപ്പുറം ടൗണിലെ ഗതാഗത കുരുക്കിന് പരിഹാരമായി നിർദേശിച്ച വൈലോങ്ങര ഓരാടംപാലം ബൈപാസിന് ഇനി വേണ്ടത് ഭൂമി ഏറ്റെടുക്കാൻ ഉത്തരവ്. പദ്ധതിയുടെ പുതിയ അലൈൻ മെന്റ് അംഗീകരിച്ച് മണ്ണു പരിശോധനയും നടത്തി. പുതിയ അലൈൻമെന്റിൽ നിർമാണ പ്രവർത്തനങ്ങളും കെട്ടിടങ്ങളും വരുന്നതിനു മുമ്പ് ഭൂമി ബൈപാസ് പദ്ധതിക്ക് ലഭ്യമാക്കാൻ കഴിഞ്ഞില്ലെങ്കിൽ പദ്ധതി വീണ്ടും പാളും. ആദ്യ അലൈൻമെന്റിൽ വീടുകൾ വരുന്നുവെന്ന കാരണത്താൽ കോടതി വ്യവഹാരങ്ങൾക്കു ശേഷം പുതിയത് അംഗീകരിച്ചതാണ്. എന്നാൽ, മറ്റു നടപടികളിലേക്ക് കടന്നിട്ടില്ല.

ബൈപാസ് ആരംഭിക്കാനിരിക്കുന്ന സ്ഥലത്തിന് സമീപം സ്വകാര്യ കെട്ടിട നിർമാണം ആരംഭിച്ചിട്ടുണ്ട്. കുതിര പാലത്തിന് അടുത്താണ് നിർമാണം. നിർദിഷ്ട ഭൂമി പദ്ധതിക്ക് ഏറ്റെടുക്കാൻ നടപടി തുടങ്ങിയില്ലെങ്കിൽ ഈ അലൈൻമെന്റും മാറ്റേണ്ടി വരും.

ആദ്യ അലൈൻമെന്റ് മാറ്റേണ്ടി വന്നത് സർക്കാർ നടപടികൾ മുന്നോട്ട് പോവാത്തതിനാൽ കൂടിയായിരുന്നു. ആദ്യം വൈലോങ്ങര ജങ്ഷനിൽ ബൈപാസ് ചെന്ന് അവസാനിക്കു ന്ന രീതിയിലായിരുന്നു രൂപരേഖ. എന്നാൽ, അവിടെ വലിയ കെട്ടിടം വന്നതോടെ അത് ഒഴിവാക്കി പുറമെ നാലു വീടുകളും അതിൽ ഉൾപ്പെട്ടതാണ്. ഇവ ഒഴിവാക്കിയാണ് പുതിയ അലൈൻമെന്റ് തയാറാക്കിയത്.

2016ൽ ഭരണാനുമതിയായ ബൈപാസിന് 12 കോടിയാണ് 2012ൽ എസ്റ്റിമേറ്റിട്ടത്. 19 കോടി യോളമാണ് ഇപ്പോൾ ചെലവ് കണക്കാക്കുന്നത്. ബൈപാസ് വന്നാൽ അങ്ങാടിപ്പുറത്തെ 40 ശതമാനം ഗതാഗത കുരുക്കിന് പരിഹാരമാവും.

വൈലോങ്ങര കുതിരപ്പാലം മുതൽ ഒരു കിലോ മീറ്ററുള്ള ഓരാടംപാലം വരെയാണ് ബൈപാസ് നിർമിക്കേണ്ടത്. വളാഞ്ചേരി റോഡിലൂടെ എത്തുന്ന വാഹനങ്ങൾ അങ്ങാടിപ്പുറം ടൗണിൽ വരാതെ ദേശീയ പാതയിൽ പ്രവേശിക്കാനാവും.
…………………………………………
കൂടുതൽ വാർത്തകൾക്ക് www.perinthalmannaradio.com എന്ന ഞങ്ങളുടെ വെബ്സൈറ്റ് സന്ദര്‍ശിക്കുക
———————————————-
പെരിന്തൽമണ്ണയിലേയും പരിസര പ്രദേശങ്ങളിലേയും വാർത്തകൾ വാട്സാപ്പിൽ   ലഭിക്കാൻ താഴെ കാണുന്ന ലിങ്കിൽ ക്ലിക് ചെയ്യുക

https://chat.whatsapp.com/E2dEC1CYZr68WrVmzEEgSL
———————————————
®Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ