Perinthalmanna Radio
Date: 21-06-2023
പെരിന്തൽമണ്ണ : ജില്ലാ ആശുപത്രിയിലെ സർജിക്കൽ വാർഡിലും സമീപത്തുമായി മൂന്നു ദിവസത്തിനിടെ പത്ത് മൂർഖൻപാമ്പിൻ കുഞ്ഞുങ്ങളെ കണ്ടെത്തി. ഇതേ തുടർന്ന് സർജിക്കൽ വാർഡിലുണ്ടായിരുന്ന എട്ടോളം രോഗികളെ സമീപത്തെ വാർഡുകളിലേക്ക് മാറ്റി. സർജിക്കൽ വാർഡിന് സമീപം ഒഴിഞ്ഞു കിടക്കുന്ന പഴയ ഒ.ടി. മുറിയിൽ നിന്നാണ് കൂടുതൽ പാമ്പിൻ കുഞ്ഞുങ്ങളെ കണ്ടെത്തിയത്. വാർഡിലും മറ്റിടങ്ങളിലുമായി പല സമയങ്ങളിലായി ജീവനക്കാരാണ് കുഞ്ഞുങ്ങളെ ആദ്യം കണ്ടത്. പിന്നീട് ട്രോമാകെയർ പെരിന്തൽമണ്ണ സ്റ്റേഷൻ യൂണിറ്റ് പ്രവർത്തകരുംചേർന്ന് തിരച്ചിൽ നടത്തി.
ചൊവ്വാഴ്ച രാത്രി ഒരു കുഞ്ഞിനെക്കൂടി കണ്ടെത്തി. നിലത്തു വിരിച്ചിട്ടുള്ള ടൈലുകൾക്കിടയിൽ ചെറിയ ദ്വാരങ്ങളുണ്ട്. പാമ്പിൻ കുഞ്ഞുങ്ങളെ കണ്ടെത്തിയതോടെ ജീവനക്കാരും രോഗികളും കൂട്ടിരിപ്പുകാരും വലിയ ആശങ്കയിലായിട്ടുണ്ട്. ആശുപത്രി വളപ്പിലുള്ള കാന്റീനിന്റെ പിന്നിൽ പുൽപ്പടർപ്പുകളുണ്ട്. ഇവിടെ നിന്നാകാം പാമ്പിൻ കുഞ്ഞുങ്ങൾ ആശുപത്രി പരിസരത്തേക്ക് വന്നതെന്നാണ് കരുതുന്നത്. സർജിക്കൽ വാർഡിന്റെ പിറകുവശം കാടുപിടിച്ചു കിടക്കുകയാണ്. ആശുപത്രി പരിസരത്തെ കാടും പരിസരവും ഇന്ന് വെട്ടിത്തെളിക്കുമെന്ന് ആശുപത്രി സൂപ്രണ്ട് ഡോ. ബിന്ദു പറഞ്ഞു.
…………………………………………
കൂടുതൽ വാർത്തകൾക്ക് www.perinthalmannaradio.com എന്ന ഞങ്ങളുടെ വെബ്സൈറ്റ് സന്ദര്ശിക്കുക
———————————————-
പെരിന്തൽമണ്ണയിലേയും പരിസര പ്രദേശങ്ങളിലേയും വാർത്തകൾ വാട്സാപ്പിൽ ലഭിക്കാൻ താഴെ കാണുന്ന ലിങ്കിൽ ക്ലിക് ചെയ്യുക
https://chat.whatsapp.com/FXWqNeniWKuCY5QVi7FWIs
———————————————
®Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ