പെരിന്തൽമണ്ണ ജില്ലാ ആശുപത്രിയിൽ സുരക്ഷ ഉറപ്പാക്കാൻ തീരുമാനം

Perinthalmanna Radio
Date: 23-06-2023

പെരിന്തൽമണ്ണ: ജില്ലാ ആശുപത്രിയിൽ രോഗികളുടെയും ജീവനക്കാരുടെയും പൊതുജനങ്ങളുടെയും സുരക്ഷ ഉറപ്പാക്കാനും ജനങ്ങളുടെ ആശങ്കയകറ്റാനുമുള്ള നടപടികൾ സ്വീകരിക്കാൻ അടിയന്തര യോഗത്തിൽ തീരുമാനം. സർജിക്കൽ വാർഡിൽ പാമ്പിൻ കുഞ്ഞുങ്ങളെ കണ്ടെത്തിയ സാഹചര്യത്തിലാണ് നജീബ് കാന്തപുരം എം.എൽ.എ. യുടെ അധ്യക്ഷതയിൽ ജില്ലാപഞ്ചായത്ത് പ്രസിഡന്റ് എം.കെ. റഫീഖ, വൈസ് പ്രസിഡന്റ് ഇസ്മായിൽ മൂത്തേടം എന്നിവരുടെ സാന്നിധ്യത്തിൽ പ്രത്യേക യോഗം ചേർന്നത്.

പാമ്പുകളുണ്ടാകാൻ സാധ്യതയുള്ള ഭാഗങ്ങളിൽ പരിശോധന നടത്തും. ഇതിന് സന്നദ്ധസംഘടനകളുടെയും വനംവകുപ്പിന്റെയും സഹായം തേടും. പരിശോധന നടത്താനും പാമ്പിന്റെ സാന്നിധ്യമില്ലാതാക്കുന്നതിന് നടപടിയെടുക്കാനും വനംവകുപ്പിനോട് നിർദേശിച്ചു. ആശുപത്രി പരിസരങ്ങളിലെ പുൽക്കാടുകൾ വെട്ടി വൃത്തിയാക്കും. ജില്ലാ ആശുപത്രിയിലെ സ്റ്റാഫ് പാറ്റേൺ നികത്തുന്നതും ഡോക്ടർമാരുടെയും അനുബന്ധ ജീവനക്കാരുടെയും ഒഴിവ് നികത്തുന്നതുമായി ബന്ധപ്പെട്ട കാര്യങ്ങളും ആരോഗ്യമന്ത്രിയുടെ ശ്രദ്ധയിൽ കൊണ്ടുവരാനും തീരുമാനിച്ചു.

ജൂലായ് നാലിന് ആശുപത്രിയിലെ ഡോക്ടർമാരുടെ യോഗം വിളിച്ചുചേർക്കും. ആശുപത്രി വികസനവുമായി ബന്ധപ്പെട്ട് ജൂലായ് 11-ന് തിരുവനന്തപുരത്ത് എം.എൽ.എ, ജില്ലാപഞ്ചായത്ത് പ്രസിഡന്റ്, വൈസ് പ്രസിഡന്റ് എന്നിവർ ആരോഗ്യമന്ത്രി വീണാ ജോർജിനെ കാണും. ജില്ലാ ആശുപത്രിയിൽ ചേർന്ന യോഗത്തിൽ ബ്ലോക്ക് പഞ്ചായത്ത് പ്രസിഡന്റ് എ.കെ. മുസ്തഫ, അംഗം നാലകത്ത് ഷൗക്കത്ത്, ആശുപത്രി സൂപ്രണ്ട് ഡോ. സി. ബിന്ദു, ആർ.എം.ഒ. ഇൻ ചാർജ് ഡോ. രാജു, മുഹമ്മദ് നയീം, എ.കെ. അബ്ദുസലാം, ഹുസൈൻ കളപ്പാടൻ, ബഷീർ ചോലക്കൽ തുടങ്ങിയവർ പങ്കെടുത്തു.
…………………………………………
കൂടുതൽ വാർത്തകൾക്ക് www.perinthalmannaradio.com എന്ന ഞങ്ങളുടെ വെബ്സൈറ്റ് സന്ദര്‍ശിക്കുക
———————————————-
പെരിന്തൽമണ്ണയിലേയും പരിസര പ്രദേശങ്ങളിലേയും വാർത്തകൾ വാട്സാപ്പിൽ   ലഭിക്കാൻ താഴെ കാണുന്ന ലിങ്കിൽ ക്ലിക് ചെയ്യുക

https://chat.whatsapp.com/FXWqNeniWKuCY5QVi7FWIs
———————————————
®Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ