പെരിന്തൽമണ്ണ ഗവ. മോഡൽ ഹയർ സെക്കൻഡറി സ്കൂളിൽ കാലാവസ്ഥാ കേന്ദ്രം പ്രവര്‍ത്തനം തുടങ്ങി

Perinthalmanna Radio
Date: 10-03-2023

പെരിന്തൽമണ്ണ: നഗരത്തിന്റെ ചൂടും കാറ്റും മഴയും കൃത്യമായറിയാൻ സംവിധാനമൊരുങ്ങി. പെരിന്തൽമണ്ണ ഗവ. മോഡൽ ഹയർസെക്കൻഡറി സ്കൂളിലാണ് കാലാവസ്ഥ നിരീക്ഷണകേന്ദ്രം പ്രവർത്തനം തുടങ്ങിയത്.

വ്യാഴാഴ്ച വൈകീട്ട് 3.15-ന് 40 ഡിഗ്രി സെൽഷ്യസ് ആയിരുന്നു കേന്ദ്രത്തിലെ പരിശോധനയിൽ രേഖപ്പെടുത്തിയത്. താപനില, കാറ്റിന്റെ വേഗത, അന്തരീക്ഷ ആർദ്രത, മഴ തുടങ്ങിയവ അളക്കാനുള്ള ഉപകരണങ്ങളാണ് കേന്ദ്രത്തിലുള്ളത്. ദിവസവും രാവിലെ എട്ടരയോടെ അധ്യാപകരും വിദ്യാർഥികളും ചേർന്ന് പരിശോധിച്ച് വിവരങ്ങൾ വിശകലനംചെയ്യും. സംസ്ഥാനസർക്കാരിന്റെ നൂറുദിന പദ്ധതിയിൽ ഉൾപ്പെടുത്തി സർവശിക്ഷ കേരള വഴിയാണ് കേന്ദ്രം സ്ഥാപിച്ചത്. 78,000 രൂപയോളം ചെലവിൽ സ്കൂളിന്റെ കാന്റീന് സമീപത്താണ് കേന്ദ്രം.

കേന്ദ്രത്തിന്റെ ഉദ്ഘാടനം നഗരസഭാ ഉപാധ്യക്ഷ എ. നസീറ നിർവഹിച്ചു. വാർഡംഗം ഹുസൈന നാസർ അധ്യക്ഷതവഹിച്ചു. എസ്.എസ്.കെ. ജില്ലാ പ്രോഗ്രാം ഓഫീസർ പി. മനോജ്കുമാർ പദ്ധതി വിശദീകരിച്ചു. നഗരസഭാംഗം മൻസൂർ നെച്ചിയിൽ, പി.ടി.എ. പ്രസിഡന്റ് പി. മുഹമ്മദ് മുസ്തഫ, പെരിന്തൽമണ്ണ ബി.പി.സി. വി.എൻ. ജയൻ, പ്രിൻസിപ്പൽ ജി. റീത്ത, സ്റ്റാഫ് സെക്രട്ടറി സുധീർ അയലക്കാട്, സീനിയർ അസിസ്റ്റന്റ് ഷൈൻ ശങ്കർദാസ് എന്നിവർ പ്രസംഗിച്ചു. ജില്ലയിലെ നാല് വിദ്യാലയങ്ങളിൽ ഇത്തരം കേന്ദ്രം സ്ഥാപിക്കുന്നുണ്ട്. വെട്ടത്തൂർ ഗവ. സ്‌കൂളിൽ നേരത്തെ പൂർത്തിയായി ജില്ലാതല ഉദ്ഘാടനം നടത്തിയിരുന്നു.
…………………………………………
കൂടുതൽ വാർത്തകൾക്ക് www.perinthalmannaradio.com എന്ന ഞങ്ങളുടെ വെബ്സൈറ്റ് സന്ദര്‍ശിക്കുക
———————————————-
പെരിന്തൽമണ്ണയിലേയും പരിസര പ്രദേശങ്ങളിലേയും വാർത്തകൾ വാട്സാപ്പിൽ   ലഭിക്കാൻ താഴെ കാണുന്ന ലിങ്കിൽ ക്ലിക് ചെയ്യുക

https://chat.whatsapp.com/EYuz71RniLNAdUHfxjrKjr
———————————————
®Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ