പെരിന്തൽമണ്ണ -പുലാമന്തോൾ റോഡ് നവീകരണം; മഴക്കാലത്തിന് മുമ്പ് പൂർത്തിയാക്കുമെന്ന് കെ.എസ്.ടി.പി

Perinthalmanna Radio
Date: 02-04-2023

പെരിന്തൽമണ്ണ: സംസ്ഥാന പാതയിൽ പുലാമന്തോൾ മുതൽ പെരിന്തൽമണ്ണ ടൗൺ വരെയുള്ള ഭാഗത്തെ നവീകരണം മഴക്കാലത്തിന് മുൻപ് പൂർത്തിയാക്കുമെന്ന് കെ.എസ്.ടി.പി. അധികൃതർ താലൂക്ക് വികസന സമിതി യോഗത്തിൽ അറിയിച്ചു. പെരിന്തൽമണ്ണ മുതൽ മേലാറ്റൂർ വരെയുള്ള പണി പൂർത്തീകരിക്കുന്നതിന് 2024 മാർച്ച് വരെ സമയം നൽകിയിട്ടുണ്ട്. റോഡ് നവീകരണം വളരെയധികം ഇഴഞ്ഞുനീങ്ങി നിരവധി പ്രതിഷേധങ്ങൾക്ക് ഇടയാക്കിയ സാഹചര്യത്തിൽ ബന്ധപ്പെട്ട ഉദ്യോഗസ്ഥനെ മാറ്റി പുതിയ ആളെ നിയമിച്ചിട്ടുണ്ടെന്ന് നിർമാണച്ചുമതലയുള്ള കെ.എസ്.ടി.പി. യുടെ സൂപ്പർവിഷൻ കൺസൾട്ടന്റ് ജോസഫ് മാത്യു യോഗത്തെ അറിയിച്ചു. ഇപ്പോൾ മെറ്റൽ ക്ഷാമമുണ്ടായതിനാലാണ് പുലാമന്തോൾ മുതലുള്ള ടാറിങ് വൈകിയത്. മുണ്ടൂരിൽനിന്ന് മെറ്റൽ എത്തിച്ച് പുലാമന്തോൾ മുതൽ കുന്നപ്പള്ളി വരെയുള്ള ഭാഗത്തെ ടാറിങ് തിങ്കളാഴ്ച തുടങ്ങാനാണ് ഉദ്ദേശിക്കുന്നതെന്ന് അദ്ദേഹം പറഞ്ഞു.

രണ്ടാംഘട്ട ടാറിങ് പൂർത്തിയായ ചിലയിടങ്ങളിൽ വിള്ളൽ വീണത് അറ്റകുറ്റപ്പണി നടത്തും. കെ.എസ്.ടി.പി. യുടെ ഉത്തരവാദിത്വത്തിൽപ്പെട്ട ആരും പങ്കെടുക്കാത്തതിൽ കഴിഞ്ഞ വികസനസമിതി യോഗങ്ങളിൽ പ്രതിഷേധമുയർന്നിരുന്നു. തുടർന്നാണ് ശനിയാഴ്ച ഉദ്യോഗസ്ഥരെത്തിയത്. തുടർന്നുള്ള എല്ലാ യോഗങ്ങളിൽ പ്രതിനിധികൾ പങ്കെടുക്കണമെന്നും പ്രവൃത്തിയുടെ പുരോഗതി ചർച്ചചെയ്യണമെന്നും സമിതി നിർദേശിച്ചു. റോഡ് പത്തു മീറ്റർ വീതിയിലാക്കി ടാറിങ്, ഇരുവശത്തും ഓട നിർമാണം, കലുങ്കുകൾ, പാലങ്ങൾ തുടങ്ങിയവ അടക്കം പുലാമന്തോൾ മുതൽ മേലാറ്റൂർ വരെ 29 കിലോമീറ്റർ ദൂരമാണ് 139 കോടി രൂപ ചെലവിൽ നവീകരിക്കുന്നത്. 2020 സെപ്തംബറിൽ മുഖ്യമന്ത്രി നിർമാണോദ്ഘാടനം നിർവഹിച്ച പാത നവീകരണം ഇതുവരെയും പൂർത്തിയാക്കാത്തതിൽ വലിയ പ്രതിഷേധം ഉയരുന്നുണ്ട്.
…………………………………………
കൂടുതൽ വാർത്തകൾക്ക് www.perinthalmannaradio.com എന്ന ഞങ്ങളുടെ വെബ്സൈറ്റ് സന്ദര്‍ശിക്കുക
———————————————-
പെരിന്തൽമണ്ണയിലേയും പരിസര പ്രദേശങ്ങളിലേയും വാർത്തകൾ വാട്സാപ്പിൽ   ലഭിക്കാൻ താഴെ കാണുന്ന ലിങ്കിൽ ക്ലിക് ചെയ്യുക

https://chat.whatsapp.com/E2dEC1CYZr68WrVmzEEgSL
———————————————
®Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ