കാദറലി അഖിലേന്ത്യാ സെവൻസ് ഫുട്ബോള്‍ ടൂർണമെന്റ് ഡിസംബറിൽ

Perinthalmanna Radio
Date: 10-04-2025

പെരിന്തൽമണ്ണ: വിദേശ ടൂർണമെന്റും അഖിലേന്ത്യാ സെവൻസും ഉൾപ്പെടെ ഒരു വർഷത്തെ പ്രവർത്തന പദ്ധതികൾ ആവിഷ്കരിച്ച് പെരിന്തൽമണ്ണ കാദർ ആൻഡ് മുഹമ്മദലി മെമ്മോറിയൽ സ്‌പോർട്‌സ് ക്ലബ്. മൂന്നാമത് വിദേശ ഫുട്ബോൾ ടൂർണമെന്റ് ഒക്‌ടോബറിലോ 2026 ഫെബ്രുവരിയിലോ സൗദി അറേബ്യയിലെ ജിദ്ദയിൽ നടത്തും. കഴിഞ്ഞ 2 ടൂർണമെന്റുകൾക്ക് ലഭിച്ച വലിയ തോതിലുള്ള ജനകീയ പിന്തുണയാണ് വിദേശ ടൂർണമെന്റ് തുടരാനുള്ള പ്രചോദനമെന്ന് ജനറൽ സെക്രട്ടറി പച്ചീരി ഫാറൂഖ് പറഞ്ഞു.

53–ാമത് കാദറലി അഖിലേന്ത്യാ സെവൻസ് ഫുട്ബോൾ ടൂർണമെന്റ് ഡിസംബറിൽ നെഹ്‌റു സ്‌റ്റേഡിയത്തിൽ നടക്കും.

16 വയസ്സിനു താഴെയുള്ള കുട്ടികൾക്കായുള്ള ഒരു മാസത്തെ ഫുട്ബോൾ പരിശീലന ക്യാംപ് തുടങ്ങിക്കഴിഞ്ഞു. 70 കുട്ടികളാണ് പങ്കെടുക്കുന്നത്. നഗരസഭാ പരിധിയിലെ വൃക്കരോഗികൾക്കുള്ള ധനസഹായ പദ്ധതിയായി 44 പേർക്ക് പ്രതിമാസം 1000 രൂപ വീതം നൽകുന്നത് ഈ വർഷവും തുടരും. കൂടാതെ കിടപ്പുരോഗികൾക്ക് ആവശ്യമായ പാലിയേറ്റീവ്–സഹായ ഉപകരണങ്ങൾ സൗജന്യമായി നൽകുന്ന പദ്ധതിയും തുടരും. ക്ലബ് അംഗങ്ങളുടെ മക്കളിൽ എസ്എസ്എൽസി, പ്ലസ്‌ ടു ഉന്നത വിജയം നേടിയവർക്ക് അവാർഡ് നൽകും. ക്ലബ് അംഗങ്ങളുടെ കുടുംബസംഗമം നടത്താനും തീരുമാനിച്ചു.

വാർഷിക ജനറൽ ബോഡി യോഗത്തിൽ ക്ലബ് പ്രസിഡന്റ് ചട്ടിപ്പാറ മുഹമ്മദലി ആധ്യക്ഷ്യം വഹിച്ചു. പച്ചീരി ഫാറൂഖ്, മണ്ണിൽ ഹസ്സൻ, എച്ച്.മുഹമ്മദ് ഖാൻ, സി.മുസ്‌തഫ, മണ്ണേങ്ങൽ അസീസ്, എം.കെ.കുഞ്ഞയമു, യൂസഫ് രാമപുരം, കുറ്റീരി മാനുപ്പ, ഇ.കെ.സലീം, വി.പി.നാസർ, ഇ.കെ.നവാസ്, പാറയിൽ കരീം എന്നിവർ പ്രസംഗിച്ചു.

പുതിയ ഭാരവാഹികൾ: സി.മുഹമ്മദ് അലി (പ്രസി), പച്ചീരി ഫാറൂഖ് (ജന. സെക്ര), എം.കെ.കുഞ്ഞയമു, യൂസഫ് രാമപുരം (വൈസ് പ്രസി), എച്ച്.മുഹമ്മദ് ഖാൻ, മണ്ണേങ്ങൽ അസീസ് (ജോ. സെക്ര), മണ്ണിൽ ഹസ്സൻ (ട്രഷ).
………………………………………..
കൂടുതൽ വാർത്തകൾക്ക് www.perinthalmannaradio.com എന്ന ഞങ്ങളുടെ വെബ്സൈറ്റ് സന്ദര്‍ശിക്കുക
———————————————-
പെരിന്തൽമണ്ണയിലേയും പരിസര പ്രദേശങ്ങളിലേയും വാർത്തകൾ വാട്സാപ്പിൽ   ലഭിക്കാൻ താഴെ കാണുന്ന ലിങ്കിൽ ക്ലിക് ചെയ്യുക

https://chat.whatsapp.com/J7NWdxCLJpk9T56B3gQkSz
———————————————
®Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ