Perinthalmanna Radio
Date: 10-04-2025
അങ്ങാടിപ്പുറം : തിരുമാന്ധാംകുന്ന് പൂരാഘോഷത്തിന്റെ ആകർഷകമായ പൂരച്ചടങ്ങായ ഭഗവതിക്കും മഹാദേവനും ഒന്നിച്ചുള്ള ആറാട്ടെഴുന്നള്ളിപ്പ് എട്ടാംപൂരമായ വ്യാഴാഴ്ച നടക്കും. ഭഗവതിക്കും മഹാദേവനും ഒരേസമയം ആറാട്ട് നടക്കുന്ന അപൂർവത ഇവിടത്തെ സവിശേഷതയാണ്. ഇവിടെ ഭഗവതിക്ക് 21 ആറാട്ടും മഹാദേവന് ഒരു ആറാട്ടും നടക്കുന്നു. രാവിലെ 9.30-നാണ് ഒന്നിച്ചുള്ള ആറാട്ടെഴുന്നള്ളിപ്പ്. ഭഗവതിയുടെയും ഭഗവാന്റെയും പഞ്ചലോഹതിടമ്പുകൾ വെവ്വേറെ കോലങ്ങളിൽ ആറാട്ടുകടവിലേക്ക് എഴുന്നള്ളിക്കും.
ആറാട്ട് കഴിഞ്ഞ് കൊട്ടിക്കയറ്റത്തിനുശേഷം ഭഗവതിയുടെ തിടമ്പ് മാതൃശാലയിലേക്കും ശിവന്റെ തിടമ്പ് ക്ഷേത്രാങ്കണത്തിൽ 21 പ്രദക്ഷിണത്തിനുശേഷം ഉത്സവക്കൊടിയിറക്കി ശിവന്റെ ശ്രീകോവിലിലേക്കും എഴുന്നള്ളിക്കും.
തുടർന്ന് ശിവനും ഭഗവതിക്കും ശ്രീഭൂതബലി.
ബുധനാഴ്ച ഏഴാംപൂരത്തിന് ഭഗവതിയുടെ ഉത്സവബലി നടന്നു. ആനപ്പുറത്ത് തിടമ്പിൽ എഴുന്നള്ളിച്ച ഭഗവതിയുടെ സാന്നിധ്യത്തിലാണ് നാലു മണിക്കൂറിലധികം നീണ്ടുനിന്ന ഉത്സവ ബലികർമ്മങ്ങൾ നിർവഹിച്ചത്. താന്ത്രിക കർമ്മങ്ങൾക്ക് തന്ത്രി പന്തലക്കോട്ടത്ത് നാരായണൻ നമ്പൂതിരിയും പന്തലക്കോട്ടത്ത് അപ്പു നമ്പൂതിരിയും നേതൃത്വം നൽകി.
പണ്ഡിറ്റ് എം. വെങ്കിടേഷ് കുമാർ ധാർവാർഡിന്റെ ഹിന്ദുസ്ഥാനി കച്ചേരി നടന്നു. നരേന്ദ്ര എൽ. നായക് മംഗലാപുരം (ഹാർമോണിയം), കേശവ് ജോഷി (ബെംഗളൂരു), വിഘ്നേഷ് കാമത്ത് കോടേശ്വർ (തബല) എന്നിവരുടെ പശ്ചാത്തലസംഗീതം ആലാപനത്തിന് മിഴിവേകി. സന്ധ്യക്ക് തിരുമുറ്റത്ത് ചെറുതാഴം ചന്ദ്രന്റെ തായമ്പക, കലാമണ്ഡലം ശിവദാസൻ, സദനം സുരേഷ് (ചെണ്ട), കലാമണ്ഡലം ഉണ്ണികൃഷ്ണൻ, കലാമണ്ഡലം മനോജ് (മദ്ദളം) എന്നിവർ ചേർന്നവതരിപ്പിച്ച ഇരട്ടക്കേളി, ആറാട്ടുകടവിൽ തൃപ്രങ്ങോട് പരമേശ്വരമാരാരുടെ തായമ്പക എന്നിവയുണ്ടായി.
രാത്രി തെക്കേനടയിൽ കമ്പം കൊളുത്തൽ ചടങ്ങോടെ ഏഴാംപൂരം സമാപിച്ചു. ടീം സവിധത്തിന്റെ നൃത്തമഞ്ജരി, ചെർപ്പുളശ്ശേരിയിലെ കലാക്ഷേത്ര ആര്യയുടെ ഭരതനാട്യം, മലപ്പുറം നൂപുരധ്വനിയിലെ വിദ്യാർഥികളുടെ നൃത്തം എന്നിവ നടന്നു.
………………………………………..
കൂടുതൽ വാർത്തകൾക്ക് www.perinthalmannaradio.com എന്ന ഞങ്ങളുടെ വെബ്സൈറ്റ് സന്ദര്ശിക്കുക
———————————————-
പെരിന്തൽമണ്ണയിലേയും പരിസര പ്രദേശങ്ങളിലേയും വാർത്തകൾ വാട്സാപ്പിൽ ലഭിക്കാൻ താഴെ കാണുന്ന ലിങ്കിൽ ക്ലിക് ചെയ്യുക
https://chat.whatsapp.com/J7NWdxCLJpk9T56B3gQkSz
———————————————
®Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ