Perinthalmanna Radio
Date: 10-07-2025
പെരിന്തൽമണ്ണ: കോഴിക്കോട്- പാലക്കാട് ദേശീയ പാതയിൽ അങ്ങാടിപ്പുറത്തെ ഗതാഗത പരിഷ്കരണങ്ങൾ തൽക്കാലം മരവിപ്പിച്ചു. ക്രമീകരണങ്ങൾ നടപ്പാക്കുന്നതിന് ആവശ്യമായ സൗകര്യങ്ങൾ ഒരുക്കിയശേഷം വീണ്ടും പരീക്ഷണാടിസ്ഥാനത്തിൽ നടപ്പാക്കും.
പരിയാപുരം റോഡിൽ നിന്നും വളാഞ്ചേരി, കോട്ടയ്ക്കൽ റോഡിൽ നിന്നും വരുന്ന, പെരിന്തൽമണ്ണ ഭാഗത്തേക്കുള്ള വാഹനങ്ങൾ മലപ്പുറം റോഡിൽ കോട്ടപ്പറമ്പിൽ, നാലു വരിപ്പാതയിൽ ഏറെ വീതിയുള്ള റോഡിൽ യുടേൺ ചെയ്യാനായിരുന്നു തീരുമാനം.
ഈ ഭാഗത്ത് ഇതിനായി റോഡ് വീതികൂട്ടി സൗകര്യമൊരുക്കാനും റോഡിലേക്കുള്ള രണ്ടു മരങ്ങൾ വെട്ടിമാറ്റാനും തീരുമാനിച്ചിരുന്നു. എന്നാൽ ഇക്കാര്യത്തിൽ ഇനിയും നടപടികൾ ആയിട്ടില്ല. ഈ സാഹചര്യത്തിലാണ് പരീക്ഷണാടിസ്ഥാനത്തിലുള്ള ക്രമീകരണങ്ങൾ തൽക്കാലം ഒഴിവാക്കിയത്.
പാതയിൽ പൊതുവേ ഗതാഗതക്കുരുക്കേറിയ തിങ്കളാഴ്ചയിൽ തന്നെ പരീക്ഷണത്തിനു തുടക്കമിട്ട്, മലപ്പുറം റോഡിലെ വീതി കുറഞ്ഞ ഭാഗത്ത് അശാസ്ത്രീയമായി വാഹനങ്ങൾ യുടേൺ ചെയ്തതോടെ വലിയ കുരുക്കാണ് അനുഭവപ്പെട്ടത്. ഇതു വിവിധ തലങ്ങളിൽ നിന്നുള്ള പ്രതിഷേധത്തിനും ഇടയാക്കിയിരുന്നു.
———————————————
Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ