Perinthalmanna Radio
Date: 30-10-2022
പെരിന്തൽമണ്ണ: വിൽപ്പനയ്ക്കെത്തിച്ച 25 ഗ്രാം എം.ഡി.എം.എ. മയക്കുമരുന്ന് പിടികൂടിയ കേസിൽ ഒരാളെക്കൂടി പെരിന്തൽമണ്ണ പോലീസ് അറസ്റ്റുചെയ്തു. കരിങ്കല്ലത്താണി 55-ാം മൈൽ കൊടക്കാട് വടശേരിപ്പുറം ആലാലുക്കൽ സൽമാനുൽ ഫാരിസിനെ(26)യാണ് പെരിന്തൽമണ്ണ പോലീസ് ഇൻസ്പെക്ടർ സി. അലവിയുടെ നേതൃത്വത്തിൽ അറസ്റ്റുചെയ്തത്.
കഴിഞ്ഞദിവസം പാതായ്ക്കര വളവിനു സമീപം നടത്തിയ പരിശോധനയിൽ അരക്കുപറമ്പ് സ്വദേശി മുഹമ്മദ് ഫാസിലിനെ അറസ്റ്റുചെയ്തിരുന്നു. ഇയാളെ ചോദ്യംചെയ്തതിൽ സൽമാനുൽ ഫാരിസ് ചെന്നൈയിൽനിന്ന് മയക്കുമരുന്ന് നാട്ടിലെത്തിച്ച് കൊടുക്കുന്നയാളാണെന്ന മൊഴി നൽകിയിരുന്നതായി പോലീസ് പറഞ്ഞു. പലതവണ ചെന്നൈയിൽ പോയി കൊണ്ടുവരുന്ന മയക്കുമരുന്ന് ചില്ലറവിൽപ്പനയ്ക്കായി കമ്മീഷൻ വ്യവസ്ഥയിൽ കൈമാറുകയാണ് ചെയ്യാറുള്ളതെന്നും പറഞ്ഞിരുന്നു. തുടർന്ന് നടത്തിയ അന്വേഷണത്തിലാണ് നാട്ടുകല്ലിൽനിന്ന് പ്രതിയെ അറസ്റ്റുചെയ്തത്. എസ്.ഐ. യാസിർ, എ.എസ്.ഐ. ബൈജു, പോലീസുകാരായ കെ.എസ്. ഉല്ലാസ്, ഷജീർ, അജിത്കുമാർ, ഷാലു, സൽമാൻ എന്നിവരാണ് അന്വേഷണ സംഘത്തിൽ ഉണ്ടായിരുന്നത്.