Perinthalmanna Radio
Date: 31-10-2022
പെരിന്തൽമണ്ണ: ലഹരിക്ക് എതിരേയുള്ള നടപടികൾ കർശനമാക്കിയതിന്റെ ഭാഗമായി ഒരുമാസത്തിനിടെ പെരിന്തൽമണ്ണ പോലീസ് പിടിച്ചെടുത്തത് 260 ഗ്രാം എം.ഡി.എം.എ.യും 155 കിലോഗ്രാം കഞ്ചാവും. മൂന്നു കേസുകളിലാണ് വിപണിയിൽ പത്തുലക്ഷത്തോളം രൂപ വിലവരുന്ന എം.ഡി.എം.എ. പിടികൂടിയത്. നാലു പ്രതികളെ എം.ഡി.എം.എ. സഹിതവും ഇവർക്ക് മയക്കുമരുന്ന് എത്തിച്ചുനൽകിയ രണ്ടുപേരെ പിന്നീടും അറസ്റ്റുചെയ്തു. പിക്കപ്പ്വാനിൽ പ്രത്യേക അറയുണ്ടാക്കി പുതിയ രീതിയിൽ കടത്തിക്കൊണ്ടുവന്ന കഞ്ചാവാണ് പിടിച്ചത്. സാധാരണ മയക്കുമരുന്നുമായി പിടിയിലാകുന്നവരിൽ അന്വേഷണം അവസാനിക്കുകയായിരുന്നു പതിവ്. എന്നാൽ കാറിലും ബൈക്കിലുമായി വിൽപ്പനയ്ക്കെത്തിച്ച കേസുകളിൽ ഇവർക്ക് മയക്കുമരുന്ന് നൽകിയവരെയും പിടികൂടി. കൊണ്ടോട്ടി സ്വദേശികളായ രണ്ടുപേരെ 35 ഗ്രാമുമായി പിടിച്ചിരുന്നു. ഇവരിൽനിന്നുള്ള സൂചനകൾ അന്വേഷിച്ചാണ് ബെംഗളൂരുവിൽനിന്ന് എം.ഡി.എം.എ. എത്തിച്ചുനൽകുന്നയാളെ പിടിച്ചത്. തുടർന്നും ഇത്തരത്തിൽ കാരിയർമാർക്ക് മയക്കുമരുന്ന് എത്തിച്ചുനൽകുന്നവരെയും പിടികൂടി നിയമനടപടികൾ സ്വീകരിക്കുമെന്ന് അന്വേഷണത്തിന് നേതൃത്വംനൽകുന്ന പെരിന്തൽമണ്ണ പോലീസ് ഇൻസ്പെക്ടർ സി. അലവി അറിയിച്ചു.