ജീവകാരുണ്യ പ്രവർത്തനങ്ങൾക്കായി തക്കാരപ്പന്തൽ ഒരുക്കി വിദ്യാർഥികൾ

Perinthalmanna Radio
Date: 09-11-2022

പെരിന്തൽമണ്ണ: ജീവ കാരുണ്യ പ്രവർത്തനങ്ങൾക്കായി പണം കണ്ടെത്താൻ ഉപജില്ലാ സ്കൂൾ കലോത്സവ നഗരിയിൽ രുചി വൈവിധ്യങ്ങളുടെ ഭക്ഷ്യ മേളയൊരുക്കി വിദ്യാർഥികൾ. പെയിൻ ആൻഡ് പാലിയേറ്റീവ് ക്ലിനിക്കിൽ ഫിസിയോ തെറപ്പി ഉപകരണങ്ങൾ വാങ്ങി നൽകുന്നതിന് തക്കാരപ്പന്തൽ എന്ന പേരിലാണ് പെരിന്തൽമണ്ണ ഗവ. ഗേൾസ് എച്ച്എസ്എസിലെ വിഎച്ച്എസ്ഇ വിദ്യാർഥികളുടെ സ്റ്റാൾ. വിദ്യാർഥികൾ വീടുകളിൽ നിന്ന് തയാറാക്കി കൊണ്ടു വന്ന ചായ, കാപ്പി, മോര്, ശീതള പാനീയങ്ങൾ, പഴങ്ങൾ, പലഹാരങ്ങൾ തുടങ്ങിയവയാണ് തക്കാര പന്തലിൽ ഉള്ളത്.

ഉപജില്ലാ കലാമേളയിൽ പങ്കെടുക്കുന്ന വിദ്യാർഥികളും അധ്യാപകരും കാഴ്ചക്കാരുമെല്ലാം തക്കാരപ്പന്തലിലെ രുചിയറിയാൻ എത്തുന്നതോടെ മണിക്കൂറുകൾക്കകമാണ് വിഭവങ്ങൾ വിറ്റഴിയുന്നത്. വിഎച്ച്എസ്ഇ അധ്യാപിക പി.റസ്മ, വൊളന്റിയർമാരായ കെ.ടി.മുബഷിർ, പി.കെ.ശിഫല, യു.വർഷ, കെ.ആർ.ഷഹാന, സി നാൻ, സാരംഗ്, ജംഷീർ, അർച്ചന രാജ് എന്നിവരുടെ നേതൃത്വത്തിൽ ആണ് പ്രവർത്തനം.