ബസ്‌സ്റ്റാൻഡ് റോഡ് നവീകരണം പൂർത്തിയാകാൻ ഒരു മാസംകൂടി

Perinthalmanna Radio
Date: 03-03-2023

പെരിന്തൽമണ്ണ: നഗരസഭയുടെ മൂസക്കുട്ടി സ്‌മാരക ബസ്‌സ്റ്റാൻഡിലേക്ക്‌ ജൂബിലി റോഡിനെയും കോഴിക്കോട് റോഡിനെയും ബന്ധിപ്പിച്ചുള്ള റോഡിന്റെ നവീകരണം പൂർത്തിയാകാൻ ഇനിയും ഒരു മാസം കൂടിയെടുക്കും. കലുങ്കുകളുടെയും ഓടയുടെയും നിർമാണം കൂട്ടിച്ചേർക്കേണ്ടി വന്നതിനാലാണ് പണി തീരാൻ വൈകുന്നതെന്ന് നഗരസഭാധ്യക്ഷൻ പി. ഷാജി കൗൺസിൽ യോഗത്തിൽ അറിയിച്ചു. അംഗം പത്തത്ത് ജാഫറിന്റെ ചോദ്യത്തിന് മറുപടി പറയുകയായിരുന്നു അദ്ദേഹം.

ഏറെക്കാലം തകർന്ന് ഗതാഗത യോഗ്യമല്ലാതായിരുന്ന റോഡിന് 20 ലക്ഷം രൂപ ആദ്യ ഘട്ടത്തിൽ അനുവദിച്ച് റീടാറിങ് നടത്തിയിരുന്നു. എന്നാൽ ഇതിനു ശേഷവും റോഡ് തകർന്നതോടെ പൂർണമായും വിപുലമായ രീതിയിൽ നവീകരിക്കാൻ പദ്ധതി തയ്യാറാക്കി ഒരുകോടി രൂപ നഗരസഭ അനുവദിച്ചു. കലുങ്ക് നിർമാണത്തിന് 15 ലക്ഷം രൂപകൂടി അനുവദിച്ചു. ഇതു വഴിയുള്ള ഗതാഗതം നിരോധിച്ച് ജനുവരി ഏഴിനാണ് നവീകരണം തുടങ്ങിയത്.

ഒരു മാസത്തിനുള്ളിൽ പൂർത്തിയാക്കാനായിരുന്നു തീരുമാനം. എന്നാൽ മറ്റൊരു കലുങ്കും ബൈപ്പാസ് ജങ്ഷനിൽ നിന്ന് റോഡിന് ഇരുവശവും ഓടയും നിർമിച്ചെങ്കിലേ റോഡിന്റെ നവീകരണം ഫലപ്രദമാകൂവെന്ന് എൻജിനിയറിങ് വിഭാഗം റിപ്പോർട്ട് നൽകി. മഴക്കാലത്ത് വെള്ളംകയറാൻ സാധ്യതയുള്ള പ്രദേശമായതിനാൽ ഈ പണികൾക്കുകൂടി അനുമതി നൽകുകയായിരുന്നു. ഓടയുടെ നിർമാണം പുരോഗമിക്കുകയാണ്.

കലുങ്ക് നിർമാണം പൂർത്തിയാകാൻ 15 ദിവസമെടുക്കും. ഇത് ബലപ്പെട്ടതിനുശേഷമേ ടാറിങ് നടത്താനാകൂ. നവീകരണം പൂർത്തിയാകുന്നതോടെ ഒരു മാസത്തിനുള്ളിൽ റോഡ് ഗതാഗത യോഗ്യമാകും.

നഗരസഭയുടെ 15 കോടി രൂപവരുന്ന 2023-24 വാർഷിക പദ്ധതിക്ക്‌ കൗൺസിൽ അംഗീകാരം നൽകി. ദാരിദ്ര്യ ലഘൂകരണം, ശുചിത്വം, വിദ്യാഭ്യാസം, പട്ടികജാതി വികസനം, സാമൂഹികനീതി, നഗരാസൂത്രണം, വനിതാവികസനം തുടങ്ങിയ മേഖലകളിലായാണ് പദ്ധതികൾ.
…………………………………………
കൂടുതൽ വാർത്തകൾക്ക് www.perinthalmannaradio.com എന്ന ഞങ്ങളുടെ വെബ്സൈറ്റ് സന്ദര്‍ശിക്കുക
———————————————-
പെരിന്തൽമണ്ണയിലേയും പരിസര പ്രദേശങ്ങളിലേയും വാർത്തകൾ വാട്സാപ്പിൽ   ലഭിക്കാൻ താഴെ കാണുന്ന ലിങ്കിൽ ക്ലിക് ചെയ്യുക

https://chat.whatsapp.com/EYuz71RniLNAdUHfxjrKjr
———————————————
®Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ