പയ്യനാട് സ്റ്റേഡിയം വീണ്ടും ഫുട്ബോള്‍ ആരവത്തിലേക്ക്

Perinthalmanna Radio
Date: 10-03-2023

മലപ്പുറം: സന്തോഷ് ട്രോഫിക്കു ശേഷം ആഘോഷപ്പന്ത് വീണ്ടും പയ്യനാട്ടേക്ക്. ഇത്തവണ സൂപ്പർ കപ്പ് മത്സരങ്ങൾ നടക്കുന്ന രണ്ടു വേദികളിലൊന്ന് മഞ്ചേരി പയ്യനാട് സ്റ്റേഡിയമാണ്. കോഴിക്കോട് കോർപറേഷൻ സ്റ്റേഡിയമാണ് മറ്റൊന്ന്. സെമി ഫൈനൽ ഉൾപ്പെടെ ആകെ 13 മത്സരങ്ങളാണ് പയ്യനാട്ടു നടക്കുക.

പയ്യനാട്ടെ ആദ്യ മത്സരം ഏപ്രിൽ 9ന് ആണ്. അവസാന മത്സരം (സെമി) ഏപ്രിൽ 22നു നടക്കും. കേരള ബ്ലാസ്റ്റേഴ്സ് ഉൾപ്പെടെ 11 ഐഎസ്എൽ ടീമുകളും 10 ഐ ലീഗ് ടീമുകളുമാണ് സൂപ്പർ കപ്പിൽ മാറ്റുരയ്ക്കുന്നത്. ഐലീഗ് ചാംപ്യന്മാരായ ടീമും ഐഎസ്എൽ ടീമുകളും ഗ്രൂപ്പ് റൗണ്ടിലേക്ക് നേരിട്ടു യോഗ്യത നേടി. ബാക്കി വരുന്ന ഐ ലീഗ് ടീമുകൾക്ക് നോക്കൗട്ട് അടിസ്ഥാനത്തിൽ യോഗ്യതാ ഉണ്ടാകും.

യോഗ്യതാ റൗണ്ട് മത്സരങ്ങളെല്ലാം കോഴിക്കോട് കോർപറേഷൻ സ്റ്റേഡിയത്തിലാണു നടക്കുക. ഇതിൽ നിന്നു തിരഞ്ഞെടുക്കപ്പെടുന്ന 4 ടീമുകൾ ഐഎസ്എൽ ടീമുകൾ ഉൾപ്പെട്ട ഗ്രൂപ്പ് റൗണ്ടിലേക്ക് യോഗ്യത നേടും. നാലു ഗ്രൂപ്പുകളിലായി ആകെ 16 ടീമുകളാണ് ഈ റൗണ്ടിൽ ഉണ്ടാവുക. ഇതിൽ ബി, ഡി ഗ്രൂപ്പ് മത്സരങ്ങൾ പയ്യനാട് സ്റ്റേഡിയത്തിൽ നടക്കും.

എ ഗ്രൂപ്പിൽ ഉൾപ്പെട്ട കേരള ബ്ലാസ്റ്റേഴിസിന്റെ മത്സരങ്ങളെല്ലാം കോഴിക്കോട്ടാണ്. ഹൈദരാബാദ് എഫ്സി, ഒഡീഷ എഫ്സി, ഈസ്റ്റ് ബംഗാൾ എഫ്സി എന്നിവയ്ക്കു പുറമേ യോഗ്യതാ റൗണ്ട് വിജയിച്ചെത്തുന്ന ടീമും ഉൾപ്പെട്ടതാണ് ബി ഗ്രൂപ്പ്. മുംബൈ സിറ്റി ചെന്നൈയിൻ എഫ്സി, നോർത്ത് ഈസ്റ്റ് യുണൈറ്റഡ്, യോഗ്യതാ റൗണ്ട് വിജയി എന്നിവർ ഉൾപ്പെട്ടതാണ് ഡി ഗ്രൂപ്പ്.

ഗ്രൂപ്പ് റൗണ്ടിൽ ഒരു ദിവസം രണ്ടു കളികൾ വീതം പയ്യനാട് സ്റ്റേഡിയത്തിൽ നടക്കും. ആദ്യ മത്സരം വൈകിട്ട് 5.30നും രണ്ടാമത്തേത് രാത്രി 8.30നും ആണു നടക്കുക. ടിക്കറ്റ് ഉണ്ടായിരിക്കും. നിരക്ക് സംബന്ധിച്ച കാര്യത്തിൽ തീരുമാനം ആകുന്നതേയുള്ളൂ.
…………………………………………
കൂടുതൽ വാർത്തകൾക്ക് www.perinthalmannaradio.com എന്ന ഞങ്ങളുടെ വെബ്സൈറ്റ് സന്ദര്‍ശിക്കുക
———————————————-
പെരിന്തൽമണ്ണയിലേയും പരിസര പ്രദേശങ്ങളിലേയും വാർത്തകൾ വാട്സാപ്പിൽ   ലഭിക്കാൻ താഴെ കാണുന്ന ലിങ്കിൽ ക്ലിക് ചെയ്യുക

https://chat.whatsapp.com/EYuz71RniLNAdUHfxjrKjr
———————————————
®Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ