Perinthalmanna Radio
Date: 03-07-2026
ഫിഫ ലോകകപ്പ് റൗണ്ട് ഓഫ് 32 പോരാട്ടങ്ങളിൽ ഉജ്ജ്വല വിജയത്തോടെ സ്പെയ്നും പോർച്ചുഗലും പ്രീ-ക്വാർട്ടറിൽ പ്രവേശിച്ചു. ആവേശകരമായ മത്സരത്തിൽ ക്രൊയേഷ്യയെ ഒന്നിനെതിരെ രണ്ടു ഗോളുകൾക്ക് (2-1) പോർച്ചുഗൽ കീഴടക്കിയപ്പോൾ, എതിരില്ലാത്ത മൂന്നു ഗോളുകൾക്ക് (3-0) ഓസ്ട്രിയയെ തകർത്താണ് സ്പെയിൻ തങ്ങളുടെ വരവറിയിച്ചത്. ഇതോടെ ജൂലൈ ഏഴിനു നടക്കുന്ന തീപാറുന്ന പ്രീ-ക്വാർട്ടർ പോരാട്ടത്തിൽ സ്പെയിനും പോർച്ചുഗലും നേർക്കുനേർ ഏറ്റുമുട്ടും.
*പോർച്ചുഗലിന്റെ ഉജ്ജ്വല തിരിച്ചുവരവ്*
ടൊറന്റോയിൽ നടന്ന മത്സരത്തിൽ പിന്നിൽ നിന്ന ശേഷമാണ് പോർച്ചുഗൽ ക്രൊയേഷ്യയെ പരാജയപ്പെടുത്തിയത്. ഇരു ടീമുകളും ഒപ്പത്തിനൊപ്പം നിന്ന ആദ്യ പകുതി ഗോൾ രഹിതമായിരുന്നു. എന്നാൽ രണ്ടാം പകുതിയുടെ തുടക്കത്തിൽ, 53–ാം മിനിറ്റിൽ ഇവാൻ പെരിസിച്ചിലൂടെ ക്രൊയേഷ്യ മത്സരത്തിൽ ആദ്യം ലീഡെടുത്തു. ജോസിപ് സ്റ്റാനിസിച് നൽകിയ ക്രോസ് വലയിലെത്തിച്ചാണ് പെരിസിച്ച് ക്രൊയേഷ്യയ്ക്ക് പ്രതീക്ഷ നൽകിയത്.
എന്നാൽ പോർച്ചുഗൽ ശക്തമായി തിരിച്ചടിച്ചു. 68-ാം മിനിറ്റിൽ ലഭിച്ച പെനാൽറ്റി ലക്ഷ്യത്തിലെത്തിച്ച് നായകൻ ക്രിസ്റ്റ്യാനോ റൊണാൾഡോ പോർച്ചുഗലിനെ ഒപ്പമെത്തിച്ചു. മത്സരം സമനിലയിലേക്ക് നീങ്ങുമെന്ന് തോന്നിച്ച ഘട്ടത്തിൽ, ഇഞ്ചുറി ടൈമിൽ (90+4) പോർച്ചുഗൽ വിജയഗോൾ നേടി. റാഫേൽ ലിയാവോ ബോക്സിലേക്ക് ഉയർത്തി നൽകിയ പന്ത് പകരക്കാരനായി ഇറങ്ങിയ ഗോൺസാലോ റാമോസ് തലകൊണ്ട് പോസ്റ്റിലേക്ക് തട്ടിയിടുകയായിരുന്നു. 90+13–ാം മിനിറ്റിൽ ക്രൊയേഷ്യയുടെ മരിയോ പസാലിച്ച് വല കുലുക്കിയെങ്കിലും നീണ്ട വാർ (VAR) പരിശോധനയ്ക്കൊടുവിൽ ഓഫ് സൈഡ് വിളിച്ചത് അവർക്ക് കനത്ത തിരിച്ചടിയായി. തോൽവിയോടെ ലൂക്ക മോഡ്രിച്ചിനും സംഘത്തിനും ടൂർണമെന്റിൽ നിന്ന് മടങ്ങേണ്ടി വന്നു.
*ഓസ്ട്രിയയെ തകർത്ത് സ്പെയിൻ*
ലോസ് ആഞ്ജലീസിൽ നടന്ന മത്സരത്തിൽ ഓസ്ട്രിയക്കെതിരെ തുടക്കം മുതൽ പൂർണ്ണ ആധിപത്യം പുലർത്തിയാണ് സ്പെയിൻ വിജയം സ്വന്തമാക്കിയത്. ഇരട്ട ഗോളുകൾ നേടിയ മിക്കൽ ഒയർസബാലാണ് സ്പാനിഷ് പടയുടെ വിജയശിൽപി. കൗമാരതാരം ലാമിൻ യമാലും ഒയർസബാലും ഡേവിഡ് ഒൽമോയുമെല്ലാം നിരന്തരം ഓസ്ട്രിയൻ ഗോൾമുഖം വിറപ്പിച്ചു.
36-ാം മിനിറ്റിലാണ് സ്പെയിനിന്റെ ആദ്യ ഗോൾ പിറന്നത്. ഇടതുവിങ്ങിൽ നിന്ന് മാർക്ക് കുക്കുറയ്യ നൽകിയ പാസ് ഒയർസബാൽ അനായാസം വലയിലാക്കി. 66-ാം മിനിറ്റിൽ അലക്സ് ബയേനയുടെ അസിസ്റ്റിൽ ഹെഡറിലൂടെ സ്പെയിൻ തങ്ങളുടെ രണ്ടാം ഗോളും കണ്ടെത്തി. തുടർന്ന് 89-ാം മിനിറ്റിൽ ഒയർസബാൽ തന്റെ രണ്ടാം ഗോളും ടീമിന്റെ മൂന്നാം ഗോളും വലയിലാക്കിയതോടെ ഓസ്ട്രിയയുടെ പതനം പൂർണ്ണമായി. ആദ്യ പകുതിയിൽ ഒരു ഷോട്ട് പോലും പോസ്റ്റിലേക്ക് ഉതിർക്കാൻ കഴിയാതിരുന്ന ഓസ്ട്രിയയ്ക്ക്, രണ്ടാം പകുതിയിൽ അർണട്ടോവിക്കിനെ കളത്തിലിറക്കിയിട്ടും മത്സരത്തിലേക്ക് തിരിച്ചുവരാൻ സാധിച്ചില്ല.
………………………………………..
കൂടുതൽ വാർത്തകൾക്ക് www.perinthalmannaradio.com എന്ന ഞങ്ങളുടെ വെബ്സൈറ്റ് സന്ദര്ശിക്കുക
———————————————-
പെരിന്തൽമണ്ണയിലേയും പരിസര പ്രദേശങ്ങളിലേയും വാർത്തകൾ വാട്സാപ്പിൽ ലഭിക്കാൻ താഴെ കാണുന്ന ലിങ്കിൽ ക്ലിക് ചെയ്യുക
https://chat.whatsapp.com/B9M7vagiKgbD6sD5VqW7XU?mode=gi_t
———————————————
®Perinthalmanna Radio
വാർത്തകൾ ഇനി നിങ്ങളുടെ വിരൽതുമ്പിൽ